Fluksi turistik dhe lëvizja e shtetasve në Shqipëri kanë shënuar nivele rekorde gjatë muajit korrik 2026.
Sipas të dhënave zyrtare të publikuara nga Instituti i Statistikave (INSTAT), mbështetur në të dhënat administrative të Policisë së Shtetit, në territorin shqiptar kanë hyrë gjithsej 2.826.615 shtetas shqiptarë dhe të huaj, duke shënuar një rritje prej 6,1 % krahasuar me të njëjtën periudhë të vitit të kaluar.
Në mënyrë të ngjashme, numri i daljes së shtetasve ka arritur në 2.661.504 persona, me një zgjerim prej 3,3 % në krahasim me korrikun e vitit 2025.
Statistikat e INSTAT-it tregojnë se motori kryesor i kësaj rritjeje mbetet turizmi i huaj, ku 99 % e hyrjeve të vizitorëve ndërkombëtarë janë kryer për qëllime personale (pushime, vizita familjare dhe tranzit).
“Gjatë muajit Korrik 2026, hyrjet e shtetasve të huaj arritën në 1.955.099 persona, duke shënuar një rritje prej 7,1 % krahasuar me Korrik 2025. Për periudhën Janar–Korrik 2026, Shqipëria ka mirëpritur mbi 7 milionë vizitorë të huaj.”, thuhet në raportin e INSTAT.
Bilanci i Lëvizjeve (Korrik 2026 vs. Korrik 2025)/ Pushuesit nga Evropa përbëjnë pjesën dërrmuese të strukturës së udhëtarëve:
Evropa Jugore: Mbetet burimi kryesor i vizitorëve me 1.178.557 hyrje në korrik 2026, duke mbuluar 64 % të totalit të hyrjeve evropiane.
Evropa Qendrore/Lindore: Shënoi rritjen më të lartë me 231.450 hyrje (nga 174.318 që ishin në korrik 2025).
Evropa Perëndimore & Veriore: Azhurnuan shifrat përkatësisht në 224.975 dhe 132.728 vizitorë.
Rajonet e Tjera: Amerika kontribuoi me 67.928 hyrje, Azia Lindore/Paqësori me 16.723, ndërsa nga Azia e Jugut u regjistruan 6.487 hyrje.
Krahasuar me tendencat e përgjithshme pozitive, hyrjet e shtetasve të huaj për qëllime biznesi dhe profesionale pësuan një rënie prej 8,9 % gjatë këtij muaji, duke konfirmuar se Korriku mbetet i dominuar plotësisht nga sezoni i turizmit masiv.
