Rritja e temperaturave gjatë verës, e shoqëruar me ardhjen e një numri të madh turistësh, ka shtuar ndjeshëm numrin e pacientëve në Pediatrinë e Spitalit Rajonal të Vlorës.
Mjekja e pavijonit, Rita Llanaj, bën të ditur se gjatë kësaj periudhe regjistrohen dhjetra vizita në ditë.
Në total, numri i vizitave ditore shkon në rreth 70-80, ndërsa 35 fëmijë shtrohen në spital. Pjesa më e madhe e tyre paraqiten me viroza sezonale, shqetësime të aparatit respirator, alergji ose pasoja nga pickimet e insekteve.
Sipas mjekes, në Pediatrinë e Vlorës po marrin shërbim edhe fëmijë nga qytete të tjera, si dhe turistë që po pushojnë në qytet. Simptomat e tyre lidhen kryesisht me temperaturat e larta dhe ekspozimin ndaj mjedisit.
Prindërve u rekomandohet të mos i ekspozojnë fëmijët në diell gjatë orëve më të nxehta. Në rast temperature të lartë, vështirësish në frymëmarrje apo shenjash të tjera shqetësuese, mjekët këshillojnë kërkimin pa vonesë të ndihmës mjekësore.
