Vapa e fortë e verës, së bashku me ardhjen e turistëve, ka rritur ndjeshëm numrin e pacientëve që kërkojnë ndihmë në Pediatrinë e Spitalit Rajonal të Vlorës.
Mjekja e pavijonit, Rita Llanaj, bën të ditur se gjatë kësaj periudhe numri i vizitave ditore arrin në rreth 70-80, ndërsa shtrimet janë 35.
Fëmijët paraqiten kryesisht me viroza sezonale, shqetësime të aparatit respirator, alergji dhe probleme të shkaktuara nga pickimet e insekteve.
Sipas mjekes, një pjesë e pacientëve vijnë nga qytete të tjera, ndërsa mes tyre ka edhe turistë që po qëndrojnë në Vlorë. Simptomat e tyre lidhen në pjesën më të madhe me temperaturat e larta dhe ekspozimin ndaj mjedisit.
Specialistët rekomandojnë që fëmijët të mos qëndrojnë në diell gjatë orëve më të nxehta. Ata kërkojnë gjithashtu që prindërit të drejtohen menjëherë për ndihmë mjekësore nëse shfaqen temperaturë e lartë, vështirësi në frymëmarrje apo shenja të tjera shqetësuese.
