Drejtori Ekzekutiv i Transparency International, Daniel Eriksson tha se Shqipëria ka potencial për të përmirësuar performancën në luftën kundër korrupsionit teksa vlerësoi platformën “Transparent Albania”.
Në mbyllje të “Javës së Integritetit” Ministri i Shtetit për Administratën Publike dhe Antikorrupsionin prezantoi platformën digjitale “Transparent Albania”. Iniciativa e re e qeverisë shqiptare ka për qëllim rritjen e transparencës në shpenzimet buxhetore duke i ofruar qytetarëve, organizatave të shoqërisë civile dhe medias akses më lehtë dhe më të shpejtë në informacionet shtetërore.
Në forumin “Ndërtimi i Besimit: Rruga e Shqipërisë drejt BE-së për qeverisje transparente”, organizuar nga Ministri i Shtetit për Administratën Publike dhe Antikorrupsionin në bashkëpunim me Delegacionin e BE-së në Shqipëri/EU4GG u mbaj paneli me tematikë “Perspektivat Evropiane dhe Ndërkombëtare” nën moderimin e Drejtores së Kabinetit të Ministrit të Shtetit për Administratën Publike dhe Antikorrupsionin znj. Fotjona Taçe, e cila hapi një dialog të thelluar mbi rëndësinë e transparencës dhe integritetit.
Një nga momentet kryesore të forumit ishte fjala e mbajtur nga Daniel Eriksson, Drejtori Ekzekutiv i Transparency International, i cili mori pjesë virtualisht në panel.
Eriksson e cilësoi platformën “Transparent Albania” si një nismë të rëndësishme dhe novatore, duke theksuar se ajo përfaqëson një hap të madh përpara për Shqipërinë në përmbushjen e standardeve më të larta të qeverisjes së hapur, integritetit, transparencës proaktive dhe garantimit të së drejtës për informim.
Më tej Eriksson u shpreh se, Shqipëria ka bërë progres dhe se ka potencial për të përmirësuar performancën e saj por dhe se është një shembull për vendet që hasin sfida në luftën kundër korrupsionit.
Gjatë fjalës që mbajti virtualisht, Drejtori Ekzekutiv i Transparency International Eriksson solli gjithashtu ekspertizën e tij të gjatë në lidhje me përpjekjet për rritjen e transparencës dhe promovimin e integritetit në të gjitha nivelet e qeverisjes.
“Java e Integritetit”, në edicionin e VI-të synoi rritjen e ndërgjegjësimit dhe angazhimin kolektiv në promovimin e sjelljes etike, transparencës, llogaridhënies dhe përgjegjshmërisë në shoqëri.
