Tre ditë pas vrasjes së shqiptarit Petrit Nikolli 42 vjeç në provincën e Riminit të Italisë dhe të arrestimit të 3 autorëve të krimit, (burri, vjehrri e kunati i mbesës) bashkëshortja e tij Ermelinda Fusha Nikolli thyen heshtjen e në një intervistë mediatike e rrëfen të vërtetën e saj mbi shkaqet e rrethanat e kësaj ngjarje.
Shqiptari Petrit Nikolli, 45 vjec, me profesionin hidraulik, babai i 3 fëmijëve e në pritje të fëmijës së katërt u qëllua për vdekje me pistoletë natën e 25 majit në komunën Riabella në provincën e Riminit.
Motivi i vrasjes qe marrja në mbrojtje e mbesës së tij, e keqtrajtuar nga bashkëshorti e familja e tij. Autorët e arrestuar të këtij krimi janë Lek, Edmond e Altin Preci.
“Nuk më intereson asgjë nga Kanuni, thotë ajo. Ne jetojmë prej më shumë se 20 vite në Itali e ashtu si Petriti nuk besojmë më në të. Mbesa e Petrit e kishte vendosur të largohej nga familja e burrit e Petriti ishte krenar për zgjedhjen e saj. Madje ai përpiqej t’i mësonte vajzës tonë 15-vjeçare se një grua nuk duhet të jetë kurrë e nënshruar.
Një natë para ngjarjes, mbesa e telefonoi Petritin e i kërkoi të vinte në Rimini e ta marri pasi kishte vendosur të mos jetonte më atje. E Petrit ishte i kënaqur, pasi e dinte se në familjen e burrit e keqtrajtonin. Prje kohësh mbesa na kishte treguar se familja e burrit e kërcënonte se do ta vriste bashkë me familjen, vëllanë e babanë. Petritin e kërcënuan se do ta vrisnin ditën që shkoi në Rimini për të marrë të mbesën, por ne nuk besonim se do të arrinin deri këtu.”
Përsa i përket 3 autorëve të vrasjes së bashkëshortit Ermelinda Fusha shprehet se ndaj tyre provon vetëm urrejtje, “Nuk dua t’i vras, por duhet të mos dalin më nga burgu. Të tre të kalben aty brenda. Ata nuk kanë reaguar në mënyrë impulsive në një moment zemërimi, ata e kanë planifikuar vrasjen e burrit tim. Kanë bërë kilometra e kilometra rrugë nga Milano deri në Rimini për ta vrarë.”
![Vrasësit e Petrit Nikollit](https://www.javanews.al/wp-content/uploads/2016/05/vrasesit-e-petrit-nikollit.jpg)
Mbi natën e ngjarjes ajo kujton se e kishte telefonuar disa herë Petritin por nuk i përgjigjej, e preokupuar i kishte telefonuar babait e vëllait të saj që jetojnë po në provincën e Riminit. Ata i kishin thënë se “Petriti vdiq!”
“Vrapova drejt vendngjarjes, – rrëfen Ermelinda. – Petriti i kishte sytë mbyllur e m’u duk se për një çast i hapi… I mata pulsin, ishte i ftohtë akull. Infermerja më tha se Petriti ka vdekur!”“
Ermelinda Fusha është shtatzënë në muajin e 6 me fëmijën e katërt e trregon se sapo ka barë një vizitë mjekësore për të kontrolluar se edhe pas kësaj drame e tronditje shpirtërore, gjëndja e fëmijës në bark është normale.
Ndërsa për 3 fëmijët e tjerë të tyre, Ermelinda rrëfen se vetëm vajza 15-vjeçare di çfarë ka ndodhur, ndërsa 2 djemtë e vegjël jo. “Deri sa janë ende të vegjël, kur t’u rrëfej mbi vdekjen e babit të tyre, shkakun do ta lidh me sëmundjen, thotë ajo, e kur të rriten do t’u tregoj të vërtetën.”
Oranews/d.i.