Alibia e Marjan Rrokut, përveç pikave të errëta që pretendon se ka për shkak të memorjes së turbullt, ka edhe mospërputhje në fakte.
Kështu nga dokumentet dhe pyetjet e bëra personave që kanë qenë afër ngjarjes, rezulton se nuk ishte viktima 16 vjecare, që e persekutonte Marjanin e armatosur dhe punonjës të SHIK-ut, por e kundërte mesa duket ka ndodhur. Kështu familja e Alda Canaj, i është drejtuar me një letër shefit të atëhershëm të SHIK-ut Fatos Klosi. Nga biseda që redaksia e dritare.net bëri me Klosin, ish shefi i shërbimit sekret e pranon që Marjani ishte një student i shkëlqyer i tij, që punoi për rreth një vit në shërbim. Gjithashtu ai pranon se familja e vajzës i ishte ankuar për përndjekjet që i bënte punonjësi i tyre. Dhe për këtë kishte ngarkuar Shefen e Kuadrit të SHIK-ut të asaj kohe, Vera Halili që të sqaronte situatën. Njëkohësisht familja kishte bërë edhe denoncimin në polici.
Ndërkohë ngjarjet nuk kanë rrjedhur sipas udhëzimeve që ka dhënë Klosi. Ose të paktën familja kështu pretendon. Pasi Vera Halili, në vend se të thërriste Marjanin për t’i tërhequr vëmendjen, kishte shkuar në Qytetin Studenti, ku banonin dy vajzat dhe ju ka kërkuar të tërhiqnin denoncimin që kishin bërë në polici, pasi Marjani nuk do ti shqetësonte më. Por nuk është vetëm kjo pika e errët e ngjarjes. Misteri fillon më pas.
Pas vrasjes, ndodhi arratisja e Marjan Rrokut në SHBA. Asgjë nuk kujton Marjani si ka ndodhur apo kush e ndihmoi. Pasi është e çuditshme që një person i mirëidentifikuar të arrijë deri në Shkodër pa rënë në asnjë postobllok. Si ariti një person në kërkim të kalonte kufirin? Nëse kjo është e imagjinueshme duke pasur parasysh mungesën e kontrolleve, ku i kishte gjetur dokumentet fallco dhe a ishte ndihmuar nga ish kolegët e tij në këtë aventurë? Pasi është e besueshme që ia ka dalë të shkojë deri në Malin e Zi. Por pas kësaj, janë një sërë shtetesh për tu kaluar deri sa të arrijë në Slloveni. Ai dëshmon se kishte shkuar në Slloveni me këto dokumenta. Si arriti të merrte vizë amerikane? Si ka mundësi në një kohë aq të shkurtër u pajis me vizë me pasaportë fallco e cila nuk arrihet të identifikohet as nga autoritetet sllovene dhe as nga ato amerikane? Pra a kanë qene këto dokumente vërtet fallco, apo ishin të rregullta, të marra nga ndonjë kasetë e SHIK-ut? Si shpjegohet që identikiti i Rrokut nuk i kaloi Interpolit edhe pas dënimit definitiv të tij, por kjo ndodhi vetëm pas këmbënguljes së Ornelës?
Dhe duke ardhur në ditët tona, a është i vetëm Marjan Rroku? Mesa duket jo. Menjëherë pas intervistës, në adresën në facebook “Dritare nga Rudina Xhunga”, kanë ardhur kërcënime, të cilat janë fshirë, pasi gazetarja në fund të emisionit, lajmëroi për to dhe u shpreh se do t’i denonconte. Po a është kjo sipërmarrje e Marjanit një iniciativë e tij, apo dikush nga jashtë i kordinon veprimet; i ofron ngjarjen Gjebresë me synim paraqitjen e tij në dritën e viktimës dhe zbutjen e zemrës së publikut dhe presidentit për një amnisti?/dritare.net
