Kur kanë kaluar 2 javë nga zhdukja e Emiliano Salës në detin që lidh Francën me Anglinë, shpresat për ta gjetur futbollistin të gjallë tashmë janë shuar.
Edhe vetë familjarët, ata të cilët më shumë se kushdo duan që të gjejnë personin e tyre, nuk kanë më besim se Sala do të gjendet i gjallë pasi në avionin e gjetur në det, është parë edhe një trup, por që ende nuk është identifikuar.
Në një prononcim për spanjollen ‘Marca’, Horasio Sala është shprehur se është dorëzuar dhe nuk ka më asnjë shpresë se djali i tij mund të jetë i gjallë. Tashmë, atij i mbetet të gjendet vetëm trupi i djalit, duke shpresuar që të jetë në avion dhe të mbyllet sa më shpejt kjo tragjedi.
“Unë nuk kam më shpresë se do të gjejnë Emilianon të gjallë. Natyrisht që do të ishte një mrekulli, por unë dua të them se kemi hequr dorë përfundimisht nga shpresa se mund të jetë i gjallë.
Shpresojmë që të dy trupat të jenë brenda avionit. Nuk kam asgjë tjetër për të thënë më shumë se kaq. Shpresoj të gjenden dy trupat atje dhe të mbyllet kjo tragjedi në këtë mënyrë”, u shpreh babai i futbollistit.
/a.rada
