Raportuesi i Parlamentit Europian për Shqipërinë Knut Fleckenstein u shpreh sot gjatë vizitës në Tiranë se Shqipëria e meriton plotësisht hapjen e negociatave në qershor, kur do të merret vendimi. Pavarësisht dorëheqjes së opozitës nga parlamenti, ai shprehet se nuk shohim ndonjë arsye për shtyrjen e mëtejshme të vendimit, pasi kushtet e vëna nga Bashkimi Europian janë përmbushur.
“Të gjithë po presim vendimin e Këshillit Evropian të 19 qershorit nëse do të hapen negociatat me Shqipërinë. Parlamenti Evropian mori me një shumicë shumë të madhe ndërpartiake një qëndrim shumë të qartë në favor të hapjes së negociatave me Shqipërinë. Misioni ynë – për të parë nëse reformat e nevojshme, veçanërisht në fushën e gjyqësorit dhe procesit të vetingut, po vazhdojnë – është konfirmuar dhe unë nuk kam dyshim se parlamenti dhe qeveria shqiptare do të vazhdojnë në rrugën e reformës. Ne nuk shohim ndonjë arsye për shtyrjen e mëtejshme të vendimit, pasi kushtet e vëna janë përmbushur” tha ai.
Referuar protestave dhe dorëheqjes së opozitës, ai kritikoi vendimin e grupeve te PD- LSI për bojkot, ndërsa bëri thirrje për përgjegjësi politike nga të gjitha forcat për të siguruar një demokraci parlamentare funksionale dhe për ta mbajtur Shqipërinë në rrugën evropiane.
“Më vjen shumë keq për vendimin e opozitës për heqjen dorë nga mandatet e tyre parlamentare. Bojkotimi i Parlamentit nuk është aspak një rrugëdalje nga problemet politike dhe është kundër parimeve demokratike. Parlamenti është forumi ku duhet të trajtohen mosmarrëveshjet politike.
Unë bëj thirrje për përgjegjësi politike nga të gjithë parlamentarët për të përmbushur detyrat e tyre dhe për të rifilluar punën parlamentare në interes të vendit dhe perspektivës së integrimit të tij në BE, jo me zgjedhjet e ardhshme në mendje. Shqipëria duhet të përqendrohet te reformat, jo te grindjet politike. Demonstratat janë një tipar thelbësor i jetës demokratike.
Megjithatë, unë i dënoj me forcë rastet e dhunës që kemi përjetuar këtë javë dhe u bëj thirrje udhëheqësve politikë të opozitës që të garantojnë protesta paqësore, në përputhje me shtetin e së drejtës“. Deklaratën Knut Fleckenstein e bëri gjatë vizitës që delegacioni i Bashkimit Europian zhvilloi në Tiranë për t’u njohur me reformat e ndërmarra nga qeveria në prag të vendimit për hapjen e negociatave që do të jetë në muajin qershor.
/a.meta
