Një zjarr i përmasave të mëdha përfshiu një banesë kolektive në qytetin e Pogradecit, duke shkaktuar dëme të rënda në banesat e 4 familjeve, dy prej të cilave janë djegur plotësisht.
Ngjarja ndodhi mbrëmjen e së shtunës, dhe falë ndërhyrjes së shpejtë të shërbimit zjarrfikës, u shmang një tragjedi edhe më e madhe, pasi zjarri rrezikonte të përhapej në të gjithë bllokun e pallateve.
Kryetari i Bashkisë së Pogradecit, Ilir Xhakolli, vizitoi vendngjarjen dhe familjet e prekura për të parë nga afër situatën.
“Zjarri ishte i përmasave të mëdha, ku u përfshinë 4 familje, dy prej të cilave u dëmtuan rëndë. Njërës prej familjeve i kemi siguruar një shtëpi me qira dhe do t’u ofrojmë ndihmë me ushqim dhe veshmbathje. Grupi i emergjencave po vlerëson dëmet dhe po marrim masat që banesat të rindërtohen sa më shpejt,” deklaroi Xhakolli.
Kryefamiljarja e njërës prej banesave, mes lotësh, përshkroi momentet dramatike që përjetoi.
“Vetë e di si shpëtova, ta kalosh të të bjerë zjarri. Çupa 4 vjeç, djali 8 vjeç… Nuk ka më keq. I mbajta fëmijët nën sqetull. Mirë që zjarrfikësit erdhën në moment. Mos të ishin ata, do kishte ndodhur një katastrofë e madhe,” tha ajo.
Bashkia e Pogradecit ka premtuar mbështetje të plotë për familjet e dëmtuara, duke siguruar strehim të përkohshëm dhe dëmshpërblime për riparimin e banesave të shkatërruara.
Ndërhyrja e zjarrfikësve dhe koordinimi i strukturave të emergjencës kanë qenë vendimtare për të parandaluar përshkallëzimin e situatës.
