Të dielën e kaluar, me 8 janar 2017, gazeta Aargauer Zeitung kishte publikuar një artikull për një afarist më prejardhje serbe.
Në mes rreshtash por edhe shumë hapur, përdorej një fjalor denigrues më një dozë antishqiptare, duke përhapur të pavërteta shpifëse me tendencë propaganduese.
Kuvendi i Shqiptarëve të Zvicrës ka reagur kundër këtij artikulli skandaloz dhe ka kërkuar sqarim nga gazeta në fjalë. Në një letërpërgjigje drejtuar Kuvendit të Shqiptarëve të Zvicrës, gazeta Aargauer Zeitung distancohet nga pjesë të tekstit, që kanë të bëjnë më shqiptarët: “Ju keni të drejtë: formulimet në disa pjesë të artikullit nuk janë të përshtatshme. Nëse me këtë kemi lënduar ndjenjat e komunitetit shqiptar në Zvicër, atëherë na vjen keq. Në asnjë mënyrë nuk ka qenë qëllimi ynë që të ofendojmë komunitetin shqiptar ose të përhapim klishe negative për të“, thuhet në përgjigjen e gazetës Aargauer Zeitung.
Kuvendi i Shqiptarëve të Zvicrës vazhdon të ndjek me vëmendje zhvillimet e mëtutjeshme rreth këtij artikulli. Tekste të tilla denigruese e shpifëse që prishin imazhin e shqiptarëve në përgjithësi e veçanërisht të shqiptarëve në Zvicër nuk kanë vend në hapësirën mediale në shtetin helvetik. Për këtë qëllim do të vazhdojmë të angazhohemi fuqishëm. Kuvendi i Shqiptarëve të Zvicrës. Bern, 15 janar 2017./albinfo/b.d
