Flamur Noka, deputet i PD-së, përjashtohet 10 ditë nga punimet e Kuvendit, për shkak të fjalorit banal dhe fjalëve fyese të përdorura prej tij në Komisionin e Sigurisë Kombëtare. Vendimi është marrë pak minuta më parë nga Byroja e Kuvendit. Byroja e Kuvendit është mbledhur pasditen e sotme nën drejtimin e n/ kryetares Valentina Leskaj pas letrës së dërguar nga Komisioni i Sigurisë për masë ndaj deputetit të PD, Flamur Noka për incidentin me ministrin Tahiri. Mbledhja u drejtua nga Leskaj, pasi kryetari Kuvendit, Ilir Meta, ndodhet në një vizitë zyrtare në Gjermani. Komisioni i Sigurisë ka kërkuar përjashtimin 10 ditë nga punimet e Kuvendit të Nokës, pasi ofendoi kryetarin e Komisionit, Spartak Braho dhe ministrin Tahiri. Byroja e Kuvendit pas kesaj kerkese vendosi perjashtimin 10 dite nga punimet e Kuvendit te deputetit Noka.
Lutaj
Sekretari i Komisionit të Sigurisë, Piro Lutaj deklaron se nuk do të zhvillohet asnjë mbledhje deri në vendimin e Byrosë së Kuvendit për deputetin e PD, Flamur Noka pas incidentit gjatë mbledhjes së djeshme ku po raportonte ministri Tahiri për buxhetin.
“Dje ishte një shfaqje e shëmtuar nga deputeti Noka. U propozua marrja e masës ndaj këtij deputeti, pasi nuk është hera e parë për këtë ligjvënës që bën veprime të tilla.
Kryetari i Komisionit njoftoi sot shtyrjen e mbledhjes deri në mbledhjen e Byrosë së Kuvendit.
Për deputetë që bëjnë shfaqje të tilla, duhet ti jepet fund. Mbledhja e komisionit, jo deri sa të japë vendim Byroja.
Nuk do të preket rendi i ditës në komision kur do të flitet për buxhetin. Sot në komision për raportim e buxhetit ishte Visho Ajazi Lika” shprehet ai.
Shtyhet raportimi i Visho Ajazait për shkak të Nokës
Raportimi i kryetarit të SHISH, gjithmonë përbën një ndër eventet më të rëndësishme në komision e Sigurisë Kombëtare. Mbledhjet zhvillohen gjithnjë me dyer të mbyllura, qoftë edhe kur parashtron kërkesat për buxhetit, për shkak të konfidencialitetit të të dhënave se ku shërbimi dëshiron të shpenzojë paratë.
Por këtë radhë raportimi i Visho Ajazi Likës tek siguria u anulua dy herë radhazi, fillimisht për shkak të ndodhjes së tij jashtë vendit dhe më pas për shkak të Flamur Nokës. Maxhoranca në komision vendosi të mos zhvillojë mbledhje deri sa Byroja e Kuvendit të vendosë për përjashtimin e deputetit demokrat.
Në shenjë proteste kjo për sjelljen ofenduese të Flamur Nokës ndaj ministrit Tahiri dhe kryetarit ët komisionit Spartak Braho. Një ditë më parë Braho i kërkoi mbledhjen e Byrosë për të përjashtuar me 10 ditë Nokën për shkak të fjalorit të përdorur prej tij.
ma.me
