Anëtarja e stafit të Donald Trump, Meredith McIver, ka pranuar rolin e saj në shkrimin e fjalimit të bashkëshortes së kandidatit për president të SHBA, në Konventën Kombëtare të Republikanëve.
Zonja e Trump, Melania Trump, gruaja e tretë e kandidatit republikan u përball me akuzat se disa pjesë të fjalimit të saj ishin kopjuar nga fjalimi i Michelle Obama, bashkëshortes së Presidentit Barak Obama.
Disa fjali në fjalimin e saj përputhen pothuajse fjalë për fjalë me ato që ka thënë zonja Obama në Konventën e Demokratëve në vitin 2008.
McIver tha se oferta e saj për të dhënë dorëheqjen u refuzua nga Trump.
“Ky ishte gabimi im, dhe unë ndjehem tmerrësisht keq për kaosin që kam shkaktuar,” tha ajo në një deklaratë.
Ajo më tej theksoi se zonja e Donald Trump i ka lexuar pjesë nga fjalimi i zonjës Obama në një bisedë telefonike teksa ato diskutonin për njerëzit që e frymëzonin.
“Një person që ajo e ka pëlqyer gjithmonë është Michelle Obama”, vijon fjalimshkruesja.
McIver më vonë i ka përfshirë frazat në fjalim pa kontrolluar fjalimet e zonjës Obama.
Zoti Trump u miratua zyrtarisht si kandidat i Republikanëve për zgjedhjet presidenciale të nëntorit.
Panorama/d.i.
