Gazetari amerikan Peter Arnett, një nga emrat më të njohur të gazetarisë ndërkombëtare dhe fitues i Çmimit Pulitzer, ka ndërruar jetë në moshën 91-vjeçare.
Lajmi është bërë i ditur nga Associated Press, agjencia me të cilën Arnett ishte i lidhur për një periudhë të gjatë të karrierës së tij.
Arnett ka vdekur në Newport Beach, i rrethuar nga familjarë dhe miq. Djali i tij, Andrew Arnett, ka konfirmuar se gazetari ndodhej në gjendje të rënduar që prej së shtunës për shkak të kancerit në prostatë.
Peter Arnett hyri në histori në vitin 1966, kur fitoi Çmimin Pulitzer për gazetari ndërkombëtare për reportazhet e tij nga lufta e Vietnamit, të realizuara për Associated Press. Nga viti 1962 deri në përfundimin e konfliktit në 1975, ai ishte vazhdimisht në terren, duke raportuar nga vijat e para të luftës dhe duke sjellë për publikun amerikan dhe botëror një pasqyrë të drejtpërdrejtë të realitetit të konfliktit.
Karriera e tij mori një dimension të ri në vitin 1991, kur Arnett u bë një fytyrë e njohur televizive në SHBA-të përmes transmetimeve të drejtpërdrejta në CNN gjatë Luftës së Parë të Gjirit, nga Iraku. Aftësia e tij për të raportuar nën presion ekstrem dhe për të ruajtur standarde të larta profesionale e konsolidoi statusin e tij si një prej reporterëve më të respektuar të kohës.
