Fitorja historike e spanjollit Carlos Alcaraz në finalen e Wimbledon vlen vetëm 2.3 milionë paund si çmim, por triumfi ndaj Novak Djokovic do ta bëjë 20-vjeçarin sensacional një target të kompanive më të mëdha që duan ta bëjnë imazhin e tyre zyrtar.
Ekspertët e fushës kanë thënë për DailMail se suksesi në Wimbledon do ti sjellë Alcaraz rreth 30 milionë paund fitime, falë kontratave që do të nënshkruajë me sponsorët deri në fund të vitit 2023.
Performanca e jashtëzakonshme e 20-vjeçarit ka forcuar vendin e tij si numri 1 i botës dhe ai tani është pasuesi natyror i Djokovic, të cilin e mundi në një finale të jashtëzakonshme me pesë sete.
Ekspertët e marketingut thonë se fitorja e së dielës do të thotë se ai ka tashmë “botën në këmbët e tij” dhe mundësinë për të katërfishuar vlerën e tij neto që aktualisht qëndron në 7 milionë paund.
Alcaraz tani është sportisti më i lakmueshëm në botë, me marrëveshje shumë milionëshe të nënshkruara me Nike, Rolex, Calvin Klein, Louis Vuitton, BMW dhe prodhuesin e raketave Babolat. Madje ai sponsorizohet nga një prodhues spanjoll i proshutës. Ekspertët kanë sugjeruar se të gjitha këto lidhje së shpejti mund të rinegociohen duke pasur parasysh suksesin e tij.
Eksperti i marketingut, Nick Ede i tha MailOnline: “Carlos Alcaraz është gati të bëhet një nga yjet më të mëdhenj në botë. Me pamjen e tij të bukur, trupin në formë dhe buzëqeshjen klasike, ai mund të jetë ambasadori i ëndrrave për çdo lloj kompanie. Nga brisqet tek kostumet dhe sigurisht veshjet sportive, ai do të fitojë shumë para dhe madje mund të lançojë markën e tij siç kanë bërë më parë Bjorn Borg ose Maria Sharipova”.
Ylli i pashëm spanjoll, sakaq besohet të jetë në një lidhje dashurie me shoqen e tij Maria Gonzalez Gimenez, e cila stërvitet në të njëjtin klub tenisi në Murcia. Ata rrallëherë shihen bashkë në publik, duke zgjedhur ta mbajnë lidhjen e tyre shumë private.
/a.r
