Ministri i Ekonomisë, Kulturës dhe Inovacionit, Blendi Gonxhe, është renditur si kandidati më i votuar në zgjedhjet e 11 majit, duke marrë mbështetje të gjerë si brenda vendit ashtu edhe nga diaspora.
Në një deklaratë për mediat, Gonxhe tha se ky rezultat nuk e ka befasuar, pasi sipas tij, është reflektim i punës konkrete që ka bërë mazhoranca dhe i projekteve në zhvillim.
“Kishim pritshmëri të mira, të mbështetura edhe nga sondazhet. Unë hyra pak më vonë në fushatë, pasi u zhvendosa nga qarku Dibër ku isha më herët, por vota që mora është mbështetje për një projekt të qartë zhvillimi,” tha ai.
Ai vlerësoi veçanërisht votën e diasporës, duke e cilësuar atë si “votën më të bukur”, pasi sipas tij, përfaqëson një vullnet të qartë për pjesëmarrje dhe besim.
Megjithatë, ministri theksoi nevojën për ndryshime në kuadrin ligjor zgjedhor, duke kërkuar përmirësime në Kodin Zgjedhor dhe reformim të sistemit të përfaqësimit.
“Formula zgjedhore ka nevojë për ndryshim. Kandidatët duhet të jenë të paktën në nivel bashkie për të garantuar përfaqësim real dhe cilësor,” u shpreh ai.
