Departamenti amerikan i Shtetit ka njoftuar sot se Presidenti Biden ka emëruar Penny Pritzker si Përfaqësuese Speciale e SHBA për Rimëkëmbjen Ekonomike të Ukrainës.
Në rolin e saj të ri, ajo do të bashkëpunojë me entitete të ndryshme ndërkombëtare, duke përfshirë qeverinë ukrainase, G7, BE dhe sektorin privat amerikan, për të mbështetur udhëtimin e Ukrainës drejt shndërrimit në një demokraci evropiane të begatë dhe të sigurt.
Përfaqësuesja Speciale Pritzker do të ketë prioritet përafrimin e prioriteteve të donatorëve me nevojat e Ukrainës dhe inkurajimin e partnerëve ndërkombëtarë për të rritur mbështetjen e tyre. Përvoja e saj e gjerë në sektorin privat, roli i mëparshëm si Sekretare e Tregtisë dhe lidhjet personale me Ukrainën e bëjnë atë të kualifikuar për këtë pozicion sipas njoftimit të DASH.
Sipas deklaratës së Sekretarit të Shtetit, Anthony Blinken, ky emërim nënvizon angazhimin për të forcuar të ardhmen evropiane të Ukrainës dhe bazohet në angazhimet e fundit ekonomike dhe të sigurisë të marra nga G7 dhe NATO. Puna e Përfaqësueses Speciale Pritzker do të përshpejtojë më tej transformimin ekonomik të Ukrainës, duke siguruar që ajo jo vetëm të mbijetojë, por edhe të lulëzojë./m.j
