Hajrie Rondo i rikthehet skenës pas fitores së betejës me sëmundjen e rëndë që kaloi.
Aktorja do ngjitet në Teatrin e Metropolit me komedinë “Tre Dhëndurët”, të Dionis Bubanin nën regjinë e Sonila Kapidanit
Rondo vjen nën petkun e nënë Sanijes, gruas tipike jugore, ndërsa rikthimin në skenë e konsideron në momentin e duhur për të lënë pas periudhë të vështirë.
Rondo: Ishte emocion, mall, akumulim dhe përgjegjësi. Më erdhi në kohën e duhur. Më erdhi në një moment, kur njeriu në jetën e tij kalon në situata të vështira, të rënda, shëndetësore dhe të tjera. Sanija është një grua tipike jugore. Por edhe kjo nuk i ka shpëtuar grackës së të shoqit, egoizmit, makutërisë, për të arritur kuotat e epërme duke u lidhur me pushtetet.
Vepra “3 dhëndurët” është një komedi karakteresh e situatash shqiptare, ku problem i tyre madhor është martesa e vajzës së vetme.
Kapidani: Shoqëria e sotme i ka ndryshimet e njëpasnjëshme politike. Familjet e një shtrese të mesme që nuk i durojnë dot ata që janë poshtë dhe i dashurojnë shumë ata që janë lart, sidomos pushtetin e jashtëm, ata të huajt. Shpesh herë gjenden në një lloj tranzicioni, nuk e dinë ku janë. Kjo i bën të kenë problematika dhe ta dëmtojnë brezin e ri. Për mua kjo ka qenë thelbi i komedisë.
Shfaqja që vjen për publikun çdo fundjavë do të ngjisë në skenën e Teatrit të Metropolit edhe aktorë të tjerë si Gëzim Rudi, Pjerin Vlashi, Linda Jarani, Elona Hyseni, etj./oranews/a.k
