Mijëra besimtarë myslimanë festojnë Fitër Bajramin në Kosovë. Manifestimi qëndror u mbajt në Xhaminë e madhe në Prishtinë. Myftiu i Kosovës, Naim Tërnava, përcolli mesazhe paqeje, për angazhim në të mirë të Kosovës dhe lëshoi thirrje për të mos braktisur vendin.
“Braktisja e vendit nuk është zgjidhje e duhur, sidomos nga të rinjtë dhe ekspertët tanë. Jeta në këtë kohë nuk ka për qëllim kryesor e mision vetëm anën materiale. Dashtë Zoti vendi ynë me angazhimin tonë të bëhet vend ku jetohet e punohet me dinjitet. Vendi ynë merr peshë e kuptim vetëm me bijtë e bijat e saj atëherë kur i kemi shtëpitë tona plot, me bijë e bija, me nipa e mbesa, kur çerdhet e shkollat t’i kemi në funksion të edukimit e mësimit se në të kundërtën i mbetemi borxh vendit dhe brezave që vijnë. E kemi obligim ta duam dhe ta ndërtojmë vendin.”
NAIM TËRNAVA, MYFTI I KOSOVËS
Imami shtoi se mësimet dhe porositë gjatë muajit të Ramazanit duhet të na shoqërojnë edhe gjatë muajve të tjerë, ndërsa vendosi theksin tek ruajtja e familjes së shëndoshë.
“Vetëm një familje e shëndoshë dhe e edukuar mirë është themeli për një komunitet e shoqëri me vlera e parime fisnike. Familja tek populli ynë në vazhdimësi ka qenë institucioni më i besuar dhe më i çmuar vlera këto të cilat duhen trasuar e ruajtur me xhelozi dhe duhet kultivuar ato te brezat e rinj.”
NAIM TËRNAVA, MYFTI I KOSOVËS
Me përfundimin e faljes së namazit të Bajramit, qytetarët në Kosovë nisën me vizitat tek të afërmit dhe miqtë e tyre.
/a.r
