Pas nënshkrimit të marrëveshjes me Kosovën për vënien në funksion të fabrikës së municioneve në bashkëpunim me të, prodhuesi shtetëror turk “Makine ve Kimya Endüstrisi” njoftoi përmes një postimi në Facebook se municionet në fjalë do të prodhohen në përputhje me standardet e NATO-s.
Ky projekt përshkruhet si një hap i rëndësishëm në forcimin e bashkëpunimit mes dy vendeve, duke kontribuuar në eksportet e industrisë mbrojtëse të Turqisë dhe duke mbështetur shtetin e Kosovës në forcimin e kapaciteteve të tij mbrojtëse. “Firmosëm një marrëveshje për themelimin e një fabrike moderne në Kosovë që do të prodhojë municione sipas standardeve të NATO-s.
Jemi krenarë që kemi kontribuuar në eksportet e industrisë së mbrojtjes së Turqisë duke forcuar vendin tonë mik Kosovën me këtë kontratë të nënshkruar”, nënvizohet në njoftim. Kontrata përfshin furnizimin me makineri prodhuese, trajnimin e stafit, mirëmbajtjen për një periudhë të caktuar kohore, si dhe pajisjen me sisteme për testim të cilësisë dhe kalibrim. Pas nisjes së prodhimit, fabrika do të funksionojë si ndërmarrje publike dhe do të jetë markë 100% vendase, shkruan shtypi në Prishtinë.
Në muajin nëntor, Qeveria e Kosovës bëri hapin e parë drejt ngritjes së industrisë së saj ushtarake, teksa kryeministri Albin Kurti tha se vendimi i fundit, të cilin e mori para mbledhjes së ekzekutivit përbën një hap të domosdoshëm për të garantuar zhvillimin e qëndrueshëm të ushtrisë.
