Pas tentativave në merkaton e verës, kur menjëherë pas emërimit te klubi italian trajneri Paulo Sousa provoi ta blinte mesfushorin, “vjollcët” nuk janë tërhequr. E përditshmja Blick theksonte se për të gjetur marrëveshjen me kampionët e Zvicrës, drejtuesit e Fiorentinës janë të gatshëm të rrisin me një milionë euro ofertën, në krahasim me shifrën e propozuar gjashtë muaj më parë.
Megjithatë, te Baseli nuk janë ende të kënaqur dhe oferta aktuale cilësohet sërish më e ulët nga pretendimi për ta mbyllur marrëveshjen në vlerën e 4,5 milionë eurove. Taulant Xhaka cilësohet një përforcim ideal për Fiorentinën, që për herë në parë në 46 vjet janë në luftën për titullin kampion në Itali. Për të realizuar ëndrrën e tifozëve drejt triumfit, presidenti Andrea della Valle duket i gatshëm të investojë në merkaton e dimrit.
Mesfushori i Shqipërisë i ka bindur përfundimisht drejtuesit e klubit nga Firence në ndeshjet e grupeve të Europa League. Pitbulli është aktivizuar përgjatë gjithë lojës në dy sfidat me Fiorentinën, duke spikatur për duelet e fituara. Xhaka ka kontratë me Baselin deri në verën e vitit 2018, ndërsa pas ofertës së radhës nga Fiorentina, drejtuesit e klubit zviceran janë shprehur se gjasat janë që 24-vjeçari të qëndrojë deri në fund të sezonit.
Supersport
