Kushdo shtetas shqiptar që aplikon për azil në Finlandë, jo vetëm që do të marrë përgjigje negative, por do të marrin njëkohësisht edhe ndalim për hyrjen e tyre në zonën Shengen. Është ambasada e Finlandës në Greqi, që mbulon edhe Shqipërinë, e cila përmes një deklarate për shtyp ka sqaruar se, pavarësisht rritjes së ndjeshme të numrit të azilkëruesve, të gjithë kanë marrë përgjigje negative.
Kjo pasi Zyra e Emigracionit e konsideron Shqipërinë një vend të qetë, sa i përket situatës së përgjithshme të sigurisë.
Vendimet ndaj kërkesave për azil të shqiptarëve janë marrë kryesisht më procedurë të përshpejtuar dhe janë konsideruar si të pabazuara.
Shumë prej azilkërkuesve kanë kërkuar edhe ndihmë për kthim vullnetar në atdhe. Por, Finlanda nuk do ta japë këtë ndihmë automatikisht për të gjithë azilantët, pasi ka dyshime se sistemi i ndihmës për kthim vullnetar po keqpërdoret.
Ambasada u ka kujtuar se, bashkë me përgjigjen negative, të gjithë azilantët do të marrin edhe ndalim hyrjeje në zonën e Schengenit. Kohët e fundit – sqaron ambasada në deklaratën e saj, – të gjithë shqiptarët që kanë marrë përgjigje negative, kanë marrë edhe ndalim hyrjeje.
