Nga Adriatik Doci
Si mos të mjaftonin 7 vite pagë me vlerë rreth 4 mijë USD në muaj, vëllai i Monika Kryemadhit, Drini Kryemadhi, ka marrë edhe shpërblime me vlerë të pazakontë tek kompania koncesionare SGS e kolaudimit të automjeteve, pranë të cilës rezulton i punësuar si mekanik.
Dhe një pjesë të parave i ka kaluar në llogari të LSI-së, partisë së kunatit dhe motrës, të cilët mbikqyrnin koncensionin. Skema e abuzimit është e qartë dhe flagrante. Ndryshimi i vetëm me rastin e Alqi Bllakos është se Bllako po kalon ditët në qeli, ndërsa Ilir Meta dhe Monika Kryemadhi vijojnë t’i shpëtojnë veprimit ligjor.
Ky raport individual tatimor i siguruar nga Report Tv, konfirmon se Drini Kryemadhi, në dhjetor të vitit 2020, në përfundim të kontratës së koncesionit monopol të kolaudimit të makinave, ka marrë nga SGS një shpërblim në vlerë 3.2 milionë lekë ose rreth 30 mijë USD.
Nga muaj nëntor të vitit 2013 deri në dhjetor 2020, vëllai i Monika Kryemadhit ka marrë mbi 360 mijë USD paga nga SGS, duke e mbyllur me një shpërblim rreth 30 mijë USD.
Në kushtet kur askush nuk e di se sa herë është paraqitur ‘mekaniku’ Drini Kryemadhi tek SGS dhe se çfarë pune konkrete ka bërë, ngrihen dyshime serioze se mbi 80 paga dhe ky shpërblim janë një ‘qokë’ e kompanisë SGS për Ilir Metën, i cili ka favorizuar kompaninë koncensionare, duke mos ushtruar asnjë kontroll dhe duke mos marrë asnjë masë për shkeljet e shumta të kontratës koncensionare, shkelje këto të denoncuara sistematikisht nga mediat.
Duke kontrolluar Ministrinë e Transporteve përmes Edmond Haxhinastos si ministër dhe Ylli Spahiut si drejtor i patentave dhe targave, Meta ka kontrolluar indirekt edhe koncensionin e kolaudimit të makinave, nga i cili përfitonte para kunati i tij.
Nga ana tjetër, Drini Kryemadhi rezulton financues i Lëvizjes Socialiste për Integrim, një parti familjare e Ilir Metës dhe Monika Kryemadhit.
Në raportet financiare vjetore që LSi ka dorëzuar në KQZ, Drini Kryemadhi rezulton në listën e donatorëve të LSI-së për vitin 2016, ku ka dhuruar rreth 9 mijë USD.
Emri i Drini Kryemadhit finguron në listën e donatorëve të Lëvizjes Socialiste për Integrim edhe në vitin 2015. Sipas këtij dokumenti zyrtar, vëllai i Kryemadhit i ka dhuruar LSI-së 300 mijë lekë ose rreth 3 mijë USD, në një kohë kur kishte nisur të merrte para nga SGS që vitin 2013.
Pra nga njëra anë vëllai i Monika Kryemadhit merrte para nga koncensionari i favorizuar nga LSI si pjesë e pushtetit dhe nga ana tjetër financonte LSI-në.
Sigurisht që bëhet fjalë vetëm për donacionet e deklaruara në vlera të ulëta. Report Tv disponon kontrata lobimi për Ilir Metën dhe LSI-në, në vlerë 1.2 milionë USD, të pa deklaruara dhe të pajustifikuara me burime të ligjshme.
Shpërblimi për Drini Kryemadhin nga SGS në dhjetor të vitit 2020
]
Drini Kryemadhi në listën e donatorëve të LSI në vitet 2015 dhe 2016/ shqiptarja.com
Foto e publikuar për herë të parë e familjes Kryemadhi, Monika dhe Drini në rresht të parë ulur, me mamanë në mes
