Shqipëria do të jetë vendi i parë që do të preket nga një dalje e mundshme e Greqisë nga Eurozona dhe për rrjedhim të falimentimit të saj. Është prestigjozja “Financial Times” e cila në një artikull të saj bën një analizë të asaj që mund të ndodhë në rajon dhe më konkretisht në Shqipëri pas referendumit grek.
Sipas gazetarit Tony Barber, pavarësisht optimizmit të shtetit shqiptar se është i gatshëm të përballojë stuhinë, numri i madh i emigrantëve shqiptarë që do të rikthehen në atdhe do të sjellë ndikime në ekonominë Shqiptare.
“Shqipëria po bëhet gati për rrezikun nga trazirat në Greqi, fqinjin e saj jugor, që mund të detyrojë dhjetëra mijëra emigrantë shqiptarë të kthehen në shtëpi, duke ndërprerë dërgesat për familjet. Ministrat e qeverisë në Tiranë shprehin besimin se sistemi financiar mund t’i bëjë ballë stuhisë, edhe pse tri banka në Shqipëri janë në pronësi dhe kontroll grek dhe që përbëjnë pothuajse 16 % të të gjithë aseteve në sektorin bankar shqiptar. Por, për shqetësimin lidhur me kthimin e emigrantëve, Shqipëria mund të jetë vendi i parë që ndjen efektet e krizës ekonomike dhe sociale në Athinë.” shkruan Barber
“Emigrantët shqiptarë kanë shkuar në Greqi që prej viteve 1990”, thotë ministri i Jashtëm i Shqipërisë, Ditmir Bushati. “Kontributi i shqiptarëve jashtë vendit, në Greqi dhe Itali, ka qenë i dobishëm në mbështetjen e ekonomisë shqiptare. Nëse flasim në aspektin ekonomik, ne e kemi ndjerë efektin e krizës greke.”
Remitancat nga shqiptarët që punojnë jashtë vendit kanë rënë nga 952 milionë euro që ishin në vitin 2007 në 544 milionë euro për vitin 2014. Edhe pse shifrat janë të vogla, ato përbëjnë rreth 5% të prodhimit të brendshëm bruto të Shqipërisë.
Rreth 180 mijë emigrantë shqiptarë janë kthyer nga Greqia në pesë vitet e fundit. Rreziku tani është se nëse emigrantët humbasin vendin e punës apo kursimet, ata do të kthehen në Shqipëri.
Kjo do të rriste papunësinë në vend, që aktualisht është në nivelin 14% të fuqisë punëtore. Ky është rreziku më serioz për Shqipërinë nga çdo pasojë që mund të vijë nga kriza greke.
