Asnjë cisternë nafte nuk është ngarkuar në ishullin Kharg, terminali kryesor i eksportit të naftës së Iranit, për të paktën një javë, duke sinjalizuar një ndërprerje të eksporteve të naftës bruto nga vendi.
Sipas raportimeve të Financial Times, që citon të dhëna nga kompani të monitorimit të transportit detar dhe satelitor, aktiviteti në terminalin strategjik ka mbetur i pezulluar pas rikthimit të një bllokade detare amerikane ndaj porteve iraniane.
SHBA-të rivendosën bllokadën në mesin e korrikut, pasi një përpjekje e ndërmjetësuar nga Pakistani për rihapjen e Ngushticës së Hormuzit dështoi.
Të dhënat e kompanive të ndjekjes së anijeve Kpler dhe Energy Aspects tregojnë se ishulli Kharg nuk ka pasur aktivitet që prej 31 korrikut. Ndërkohë, kompania e inteligjencës detare Windward raportoi se pamjet satelitore tregojnë se tre pikat kryesore të ngarkimit në terminal kanë mbetur bosh për një periudhë të zgjatur.
Sipas Windward, vetëm 16 anije kanë qëndruar të ankoruara pranë ishullit, numri më i ulët i regjistruar që nga fillimi i muajit të kaluar.
Ishulli Kharg është një pikë kyçe për ekonominë iraniane, pasi rreth 90% e eksporteve të naftës bruto të Iranit transportohen nga ky terminal në Gjirin Persik. Shumica e vijës bregdetare iraniane nuk ka thellësinë e nevojshme për ankorimin e cisternave të mëdha të naftës.
Richard Bronze, kreu i gjeopolitikës në Energy Aspects, tha se bllokada duket se po funksionon duke kufizuar lëvizjen e tankerëve, por shtoi se ndërprerja e eksporteve nuk pritet domosdoshmërisht të detyrojë Teheranin të bëjë shpejt lëshime në negociatat me Uashingtonin.
Sipas tij, autoritetet iraniane besojnë se kanë avantazh sa i përket kontrollit të situatës në Ngushticën e Hormuzit dhe janë të gatshme të përballojnë presionin ekonomik për të ruajtur pozicionin e tyre.
