Në 4 muajt e parë të vitit, buxheti i shtetit ka arkëtuar rreth 275.7 miliardë lekë, duke tejkaluar planin e periudhës në 105.2 %.
Krahasuar me të njëjtën periudhë të një viti më parë, u mblodhën rreth 28.8 miliardë lekë apo 288 milionë euro ose 11.7 % më shumë.
Të ardhurat tatimore të mbledhura nga administrata tatimore (të ardhurat nga TVSH neto në vend, tatimi mbi fitimin, tatimi mbi të ardhurat personale, taksat nacionale), për periudhën Janar-Prill 2026, u realizuan në shumën 98 miliardë lekë, 6.5 miliardë lekë o më shumë se katërmujori i vitit 2025, duke tejkaluar planin me 2.3 miliardë lekë.
Të ardhurat nga TVSH e arkëtuar (neto) kanë pasur rritjen më të lartë, nxitur ndjeshëm nga konsumi i popullatës, duke u realizuat në shumën 29.5 miliardë lekë, 4 miliardë lekë ose 15.7% më shumë se katërmujori 2025, një realizim në masën 114.5% të planit . Të ardhurat e mbledhura nga tatimi mbi fitimin u realizuan në shumën 23.6 miliardë lekë, ose 87.4% e planit për katërmujorin 2026. Nga tatimi mbi të ardhurat personale u mblodhën 28.4 miliardë lekë, 1.3 miliardë lekë më shumë se një vit më parë. Nga taksat nacionale u arkëtuan 16.4 miliardë lekë, me rritje rreth 2.1 miliardë lekë. Ndërsa nga sigurimet shoqërore dhe shëndetësore u arkëtuan 66.8 miliardë lekë, 7.4 miliardë lekë ose 12.5% më shumë se katërmujori 2025, si dhe me realizim prej 102.8% të planit.
Të ardhurat e mbledhura nga administrata doganore (të ardhurat nga TVSH në import, akciza, taksa doganore dhe renta minerare) u realizuan në vlerën 73.6 miliardë lekë, 1.2 miliardë lekë shumë një vit më parë, me realizim në masën 96.8% të planit për periudhën 4-mujore.
Të ardhurat nga TVSH në import, rezultuan në 49.5 miliardë lekë, 1.4% më shumë se se një vit më parë. Të ardhurat nga akciza, u realizuan në shumën 20.4 miliardë lekë, ose 2.2% më shumë se një vit më parë dhe 97.5% e planit.
Të ardhurat e arkëtuara nga renta minerare në eksport, janë në shumën 600 milionë lekë, dhe të ardhurat nga taksat doganore, për periudhën Janar-Prill 2026, janë në vlerën 3.1 miliardë lekë.
Shpenzimet e përgjithshme publike, për periudhën 4 mujore të vitit 2026, arritën në rreth 221.6 miliardë lekë me një realizim në masën 95.1% të planit të periudhës dhe 12.9 miliardë lekë më shumë se një vit më parë.
