Janë finalizuar brenda 12 orëve, 3 operacione policore të koduara “Videoprojectors”, “Medicus” dhe “Friend”, për goditjen e veprimtarisë kriminale në fushën e vjedhjes së pronës dhe pasurisë në Tiranë.
Në pranga janë vënë shtetasit: Eduart Zekaj, Armand Nushi dhe Emilian Imeri, si dhe janë sekuestruar 18 videoprojektorë që dyshohet se janë vjedhur.
Njoftimi:
Finalizohen nga Komisariati i Policisë Nr. 4, brenda 12 orëve, 3 operacione policore, të koduara “Videoprojectors”, “Medicus” dhe “Friend”, për goditjen e veprimtarisë kriminale në fushën e vjedhjes së pronës dhe pasurisë.
Gjatë operacionit policor të koduar “Videoprojectors”, u vu në pranga një shtetas, si dhe u procedua penalisht një tjetër. U sekuestruan 18 videoprojektorë, të dyshuar të vjedhur.
Gjatë operacionit policor të koduar “Medicus”, u vu në pranga një shtetas që tentoi t’i vidhte me dhunë telefonin, një shtetasi tjetër.
Gjatë operacionit policor të koduar “Friend”, u vu në pranga një shtetas që dyshohet se ka vjedhur sende në një magazinë.
Shërbimet e Komisariatit të Policisë Nr. 4, në vijim të punës për goditjen e veprimtarisë kriminale në fushën e vjedhjes së pronës dhe pasurisë, pas një pune të mirëfilltë hetimore, organizuan dhe finalizuan me sukses operacionet policore të koduara “Videoprojectors”, “Medicus” dhe “Friend”.
Në kuadër të operacionit policor të koduar “Videoprojectors” u bë arrestimi në flagrancë i shtetasit:
– E. Z., 29 vjeç, banues në Tiranë, si dhe u procedua penalisht shtetasi R. K., 40 vjeç, banues në Tiranë.
Shtetasi E. Z., në kohë dhe vende të ndryshme, dyshohet se ka vjedhur 18 videoprojektorë në 4 universtitete të Tiranës, ndërsa shtetasi R. K., ka përvetësuar sendet e vjedhura.
Në cilësinë e provës materaile u sekuestruan 18 videoprojektorë, të dyshuar të vjedhur.
—
Në kuadër të operacionit policor të koduar “Medicus” u bë arrestimi i shtetasit:
– A. N., 45 vjeç, banues në Tiranë.
Shtetasi A. N., në Rrugën e Dibrës, ka tentuar ti vjedhë me dhunë, telefonin shtetasit L. S., dhe më pas është larguar. Gjithashtu, nga verifikimet e kryera ka rezultuar se me datë 23.09.2022, ka vjedhur shuma parash në dyqanin në pronësi të shtetasit Th. J.
—
Në kuadër të operacionit policor të koduar “Friend” u bë arrestimi i shtetasit:
– E. I., 26 vjeç, banues në Tiranë.
26-vjeçari, dyshohet se ka vjedhur sende të ndryshme, në magazinën në pronësi të shtetases E. N.
Punohet për dokumentimin e vjedhjeve të tjera, që mund të jenë kryer nga këta shtetas. Materialet i kaluan Prokurorisë, për veprime të mëtejshme procedurale.
/e.d
