Prokuroria dhe Gjykata e Krimeve të Rënda do të shkrihen brenda muajit dhjetor. Në mbledhjen e fundit ku u bë emërimi i 8 emrave të SPAK, është diskutuar dhe për emrat që do të largohen nga Prokuroria e Krimeve të Rënda. Sipas diskutimeve, do të ndërpriten komandimet e prokurorëve të SPAK që janë në prokuroritë e rretheve, ndërsa prokurorët e Shkallës së Parë dhe të Apelit do të transferohen në prokurori të tjera rrethesh, kryesisht në ato të Apelit.
Sipas të dhënave të gazetës Sot, janë 11 prokurorë të Shkallës së Parë dhe 3 të Apelit që transferohen. Disa prej tyre janë: Besim Hajdarmataj, Arenc Çela, Blerim Tominaj, Njazi Seferi, Olsian Çela (Kandidat për kryeprokuror), Henrik Ligori, Sonila Muhametaj, Pranvera Pustina, Vladimir Mara, Dritan Prençi. Shumica e emrave të mësipërm janë duke pritur vetingun dhe aty do varet fati i tyre.
Procedurat
Ligji për statusin e gjyqtarëve dhe prokurorëve ka përcaktuar me detaje procedurat që do të ndiqen si për gjyqtarët ashtu dhe për prokurorët e Krimeve të Rënda. “Prokurori në detyrë në Prokurorinë e Krimeve të Rënda të Shkallës së Parë ose të Apelit qëndron në pozicionin e tij deri në momentin e krijimit të Prokurorisë së Posaçme, me përjashtim të rasteve kur ka shkaqe për mbarimin e statusit të magjistratit, ose si rezultat i procesit të rivlerësimit; Këshilli i Lartë i Prokurorisë cakton në mënyrë të përhershme prokurorët në Prokurorinë e Posaçme për gjykimin e veprave penale të korrupsionit dhe krimit të organizuar, në përputhje me parashikimet e ligjit “Për organizimin dhe funksionimin e institucioneve për të luftuar korrupsionin dhe krimin e organizuar”, shkruhet në ligj. Nga ana tjetër, neni 162, thekson se gjyqtarët në detyrë në shkallën e parë dhe në shkallën e dytë, do të qëndrojnë në pozicionin e tij deri në momentin e krijimit të gjykatave të posaçme për gjykimin e veprave penale të korrupsion. Në ligj, përjashtohen gjyqtarët të cilët i ka mbaruar statusi i magjistratit, ose nuk ka kaluar me sukses në sitën e vetingut. “Gjyqtari në detyrë në Gjykatën e Shkallës së Parë për Krime të Rënda ose Gjykatën e Apelit për Krimeve të Rënda qëndron në pozicionin e tij deri në momentin e krijimit të gjykatave të posaçme për gjykimin e veprave penale të korrupsionit dhe krimit të organizuar, me përjashtim të rasteve kur ka shkaqe për mbarimin e statusit të magjistratit, , ose si rezultat i procesit të rivlerësimit”, shkruhet në ligj.
Gjyqtarët e SPAK
Por, gjyqtarët do të caktohen në mënyrë të përkohshme nga KLGJ në Gjykatën e Posaçme për gjykimin e veprave penale të korrupsionit dhe krimit të organizuar, por me disa kërkesa, ku përfshihet kalimi me sukses i vetingut. “Këshilli i Lartë Gjyqësor cakton në mënyrë të përhershme gjyqtarët në detyrë në gjykatën e posaçme për gjykimin e veprave penale të korrupsionit dhe krimit të organizuar, me kërkesë të tyre, nëse: a) gjyqtari kalon me sukses procesin e rivlerësimit, sipas përcaktimeve të ligjit “Për rivlerësimin e gjyqtarëve dhe prokurorëve në Republikën e Shqipërisë”; b) përmbush kriteret për ngritjen në detyrë, sipas përcaktimeve të nenit 47 të këtij ligji; c) gjyqtari, si dhe familjarët e afërm të tij japin pëlqimin për kontrollin periodik të llogarive të tyre bankare dhe të telekomunikimeve vetjake” shkruhet në ligj.
