Ushtria amerikane pranoi për herë të parë se ka vendosur armë në hapësirë, ndërsa Kina dhe Rusia zgjerojnë programet e tyre ushtarake në orbitë.
“Shtetet e Bashkuara tani kanë armë për kontrollin e hapësirës në orbitë të afta për të mbrojtur forcën e përbashkët kundër veprimeve armiqësore të kundërshtarit”, tha sekretari i forcave ajrore Troy Meink në një konferencë të Shoqatës së Forcave Ajrore dhe Hapësinore në Maryland.
Meink nuk pranoi të deklaronte se çfarë ishte arma ose të jepte detaje mbi aftësitë e saj, por tha se formulimi i tij i saktë ishte “i rëndësishëm nga një perspektivë parandalimi” dhe hollësi të mëtejshme mbi “atë që po bëjmë në të vërtetë nuk do t’i sillte dobi këtij parandalimi”.
Ai shtoi se SHBA- të duhej të siguroheshin që mund të “operonin lirisht” në hapësirë dhe se ajo ishte një arenë e rëndësishme për sigurinë ushtarake dhe ekonomike amerikane.
Njoftimi i Meink vjen ndërsa administrata Trump nxiton të ndërtojë kapacitete hapësinore për mburojën e saj mbrojtëse nga raketat “Kupola e Artë”. Sekretari i forcave ajrore tha të hënën se tani kishte “pajisje të gatshme për fluturim” për interceptorët në hapësirë, një tipar përcaktues i Kupolës së Artë që do të interceptonte raketat sulmuese në hapësirë.
Megjithatë, ekspertët e sigurisë hapësinore paralajmëruan se zbulimi i SHBA-së në lidhje me një armë orbitale mund të rezultojë në përhapjen e armëve hapësinore nga qeveritë e tjera.
Forca Hapësinore Amerikane e përcakton “kontrollin e hapësirës” si “aktivitete mbrojtëse ose ofensive të nevojshme për të kundërshtuar dhe kontrolluar domenin hapësinor”, me qëllim superioritetin hapësinor. Në kuadrin e saj të luftimit, shërbimi ka thënë se sulmet orbitale mund të përfshijnë përdorimin e armëve kinetike – ose fizikisht shkatërruese – dhe atyre jokinetike.
Kontrolli i hapësirës, i cili mund të ndodhë në hapësirë dhe në Tokë, mund të përfshijë sulmin ndaj një stacioni satelitor tokësor ose bllokimin e një komunikimi satelitor, tha Clayton Swope, zëvendësdrejtor i projektit të sigurisë hapësinore në Qendrën për Studime Strategjike dhe Ndërkombëtare.
Por Swope, një ish-oficer i inteligjencës teknike të CIA-s, tha se Meink ishte “shumë i paqartë” për të penguar siç duhet Kinën dhe Rusinë.
