Një javë para ardhjes në pushtet, historia e Vetëvendosjes është dënuar me vdekje, pasi i prish punë pushtetit të ri. Është fshirë gjithë historia e saj politike, gjithë aksionet e saj guerile, gjithë qëndrimet dhe deklaratat antiperëndimore, gjithë axhenda e saj anti Kosovë.

Nuk duhet të vajtoni për ato që janë fshirë pasi kanë qenë të gjithë marrëzira. Aty ka qenë e dokumentuar se ky Albin Kurti luftoi Marrëveshjen e Rambujes nga Prishtina, si kundërshtoi ardhjen e trupave ndërkombëtarë, si u përlesh me UNMIK, si kundërshtoi pavarësinë e Kosovës, si kundërshtoi EULEX apo bisedimet ndërkombëtare për Kosovën. Të gjitha kanë qenë gjepura, për të relativizuar suksesin politik të Kosovës dhe për të ngritur profilin e tij politik.

Gjithkush që e ka sulmuar Albin Kurtin për ato që ka bërë ka qenë në rregull. Biles dhe Vjosa Osmani e Donika Gërvalla në rregull kanë qenë që e kanë sulmuar si Hugo Chaves, pasi ashtu ka qenë. Tani nuk janë në rregull.  S’di pse Vjosa u nxitua që tha “kam qenë e manipuluar”, pasi ndërkohë Albini po i fshinte vet marrëzitë e jetës së tij. Pra Albini kishte reflektuar ndërkohë që Vjosa kërkonte ndjesë. Ajo thjeshtë mund të thoshte që Albini ka qenë i manipuluar e tani po sillet normal.

Tani të dielën që vjen jeni më të qetë. Mos kini frikë nga gjithë marrzite që ka bërë Albini. Ai i fshiu ato. I harroi. Nuk i duhen më. As kauza e bashkimit Kombëtar nuk i hynë më në punë Sic ka thënë Vjosa i takon brezave që vijnë. Glauku mund të tërhiqet dhe nga kërkesa që ambasada të mos jetë në Jerusalem, se nuk është se  e kishte seriozisht. Ja kanë kërkuar ca votues myslimanë, por pas zgjedhjeve e fshijmë dhe këtë deklaratë.

Pas kësaj e vetmja pyetje është kush janë këta që po vijnë ën pushtet?

E shkuara e tyre nuk ekziston më, se ata e mohuan vet. Identiteti i tyre politik, është një amalgamë, majtisto- enveriste, pastaj rugoviste, pastaj muslimano- erdoganiste, antisemite, e deri tek antiamerikane. Të gjithë së bashku kanë vënë në qendër Albin Kurtin, i cili ka aftësinë e duhur të mos ketë më turp nga asgjë që ka bërë, mjafton të marr pushtetin. Kanw  dhe Vjosën, paksa të hutuar nga droja, se mos e manipulojnë përsëri.

Të dielën që vjen në pushtet vijnë të manipuluarit, të zhgënjyerit nga kasta e vjetër e pushtetit dhe të gënjyer nga spekulantët e rinj, vijnë ata që ranë në kurthin e një lëvizje që po manipulon prej 20 vitesh njerëzit në Kosovë,  të ndjekin rrugën e tyre dhe një javë para pushtetit fshijnë gjurmët nga kanë ardh. Tani mbaroi ëndrra e Albin Kurtit. Mu këtu e kishte misionin.  E diela që vjen është fillimi i kohës së Albin Kurthit.