Nga Miwa Suzuki dhe Ursula Hyzy
Kryeministri konservator japonez, Shinzo Abe arriti sot një fitore të ndjeshme në legjislativet e parakohshme, në përfundim të të cilave ai është angazhuar menjëherë të veprojë me vendosmëri përballë kërcënimeve të Koresë së Veriut, që sunduan edhe fushatën elektorale.
Koalicioni i krijuar nga Partia Liberaldemorakte (PLD, e djathtë) e Abesë dhe partia Komeito (qendër e djathtë) pritet të marrë të paktën 312 nga 465 vende në Dhomën e Ulët të Parlamentit, ose një maxhorancë që arrin dy të tretat, sipas vlerësimeve gati përfundimtare të dhëna sot nga kanali publik NHK.
Falë fitores së tij, Abe gjendet i legjitimuar edhe në vendosmërinë e tij përballë Koresë së Veriut, si dhe mbështetjes së pozicionit të aleatit amerikan që konsiston në mbajtjen hapur të të gjitha mundësive, përfshirë edhe atë ushtarake kundër Phenianit.
Ndryshimi i Kushtetutës
Në pushtet që prej fundit të vitit 2012, Abe, 63 vjeç, mund të qëndrojë në krye të Japonisë deri në vitin 2021 dhe të arrijë rekordin e jetëgjatësisë si kryeministër.
Skandalet e ndryshme që preknin pjestarë të qeverisë detyruan Abenë të zhvillonte zgjedhje të parakohshme, duke përfituar njëkohësisht edhe nga një opozitë e copëtuar. Media cilësonte sot në mëngjes këtë dobësi të kundërshtarëve të tij si arsyen e kësaj fitoreje.
I ndërgjegjshëm për këtë situatë, Abe u shfaq dje në mbrëmje me modesti dhe kujdes, duke u shprehur se i shikon sfidat e fitores me ultësi.
Për sa i përket rishikimit të Kushtetutës, dëshirë e madhe e nacionalistëve japonezë që mbështesin Abenë, ai nuk u tregua i nxituar dje në mbrëmje, duke treguar dëshirën për të arritur një konsensus sa më të gjerë të jetë e mundur.
“Nuk parashikoj të propozoj një amendament vetëm me koalicionin në pushtet. Ne do të përpiqemi të kemi mbështetjen më të madhe që është e mundur”, tha ai.
“Abe dëshiron të ketë një amendament të Kushtetutës dhe ne e dimë që ai është ideologjikisht i djathtë, por është gjithashtu pragmatik dhe duket se ky pragmatizëm do ta pengojë që të mëshojë shumë mbi këtë çështje”, vlerësoi Gerald Curtis, profesor i shkencave politike në Universitetin Kolumbia në Nju Jork.
Dështim i guvernatores Koike
Partia e Shpresës, e krijuar pak para zgjedhjeve dhe e drejtuar nga guvernatorja karizmatike e Tokios, Yuriko Koike, pritet të arrijë 49 deputetë, sipas NHK-së. Ndërsa formacioni tjetër opozitar, Partia Demokratike Kushtetuese ka arritur 54 vende në Parlament.
“Arsyet e hymbjes do të shqyrtohen më në thellësi, por duhet të kërkoj falje përballë votuesve nëse fjalët dhe sjellia ime i ka mërzitur. Duhet të pranoj se edhe araoganca ime është për t’u kritikuar”, deklaroi Koike dje nga Parisi ku gjendej në kuadër të një mbledhje ndërkombëtare të kryebashkiakëve të angazhuar në luftën kundër ndoties.
Kjo grua e djathtë, 65 vjeç, një ish-yll i televizionit, ish-ministre e Abesë si dhe nacionaliste, u përball me një rënie të popullaritetit kur vendosi të mos prezantohet si kandidate në Parlament, në një vend ku Kushtetuta imponon që kryeministri duhet të zgjidhet nga deputetët ose senatorët. /b.d
