Ish-boksieri i famshëm, kampion bote i peshave të rënda në WBO dhe WBC, prej disa vitesh kryebashkiak i Kievit, Vitali Klitschko, dhe gruaja e tij Natalia janë ndarë. “Kemi bërë kërkesë për divorc së bashku, sepse jetojmë të ndarë prej vitesh dhe duam ta bëjmë edhe zyrtarisht tani”, – ka konfirmuar 51-vjeçari ukrainas për “Bild”.
Çifti ishte i martuar prej 26 vitesh. Boksieri dhe modelja u martuan në vitin 1996. Ata kanë tre fëmijë së bashku. Djali Yegor-Daniel lindi në vitin 2000, i ndjekur nga Elizabeth-Victoria më 2002 dhe Max më 2005. Ky i fundit e ka marrë emrin prej ikonës gjermane të boksit Max Schmeling.
“Do ta mbështesja dhe do ta ndiqja gjithmonë”, – tha Natalia Klitschko në një intervistë për “Welt”. Vetë Klitschko nuk dha asnjë informacion për arsyet e shkuarjes drejt divorcit: “Ne kemi një marrëdhënie shumë të mirë, e respektojmë njëri-tjetrin, por prej kohësh jetojmë të ndarë në qytete të ndryshme”.
Sipas raportit, Natalia Klitschko jeton në Hamburg. Si kryebashkiak i Kievit, Klitschko është një figurë qendrore në luftën kundër Rusisë. 48-vjeçarja, nga ana e saj është e angazhuar për të ndihmuar njerëzit që kanë ikur nga atdheu i tyre dhe janë vendosur në Gjermani.
Ashtu si vëllai i tij më i vogël, Wladimir, Klitschko mund të shikojë prapa në një karrierë të suksesshme si sportist. Si boksier profesionist dueloi në ring 47 herë. Nga këto, fitoi 45 duele, 41 herë me nokaut. Dëmtimet e ndaluan dy herë.
Dy vëllezërit nuk u grindën kurrë, pavarësisht se dyshohet se morën shuma të majme deri në 100 milionë dollarë nga promovuesit dhe sponsorët. Pas përfundimit të karrierës së tij sportive, Klitschko u ngrit në politikë.
Në vitin 2006 kandidoi për herë të parë për postin e kryetarit të bashkisë së Kievit. Në vitin 2014, më në fund arriti ta fitojë bashkinë e kryeqytetit ukrainas. Së fundi u rizgjodh kryebashkiak në vitin 2020.
/a.r
