300 Qendra Shëndetësore do të rehabilitohen tërësisht në 4 vite, në përmbushje të programit kombëtar të Qeverisë shqiptare për përmirësimin e kujdesit shëndetësor parësor në vend, me synim rritjen e cilësisë së shërbimit për qytetarët pranë vendbanimeve.
Veç këtij angazhimi madhor, Ministria e Shëndetësisë dhe Mbrojtjes Sociale po vijon një bashkëpunim të suksesshëm me Agjencisë Zvicerane për Zhvillim dhe Bashkëpunim, nëpërmjet projektit të saj ‘Shëndet për të Gjithë’, për të përmirësuar më tej infrastrukturën në kujdesin shëndetësor parësor, aty ku janë nevojat.
Pas investimeve të rëndësishme në qarkun e Dibrës, ku po përfundon rehabilitimi I plotë dhe pajisja e 4 qendrave shëndetësore, pak ditë më parë, ka nisur puna për rikonstruksionin e plotë të 4 qendrave shëndetësore në Qarkun e Fierit, përkatësisht atë të Krujanit, Roskovecit, Patosit dhe Strumës.
Gjashtëdhjetë e tre milion Lekë është vlera e punimeve për rikonstruksionin dhe furnizimin me aparatura të reja të këtyre 4 qendrave shëndetësore, për të ofruar një shërbim sa më të mirë dhe cilësor të kujdesit shëndetësor parësor për mbi 50 mijë banorët e këtyre zonave.
Punimet për rehabilitimin e katër qendrave shëndetësore kanë filluar pak ditë më parë dhe qendrat e rehabilituara priten të jenë gati brenda muajit maj të vitit 2018.
Rikonstruksioni i këtyre qendrave shëndetësore, përfshin punime në çati, dysheme, ndriçim dhe sistemin hidraulik, lyerje, instalim të sistemit të ngrohjes dhe ftohjes si dhe rrethimin me mur.
Qendrat e rinovuara do të përfshijnë recepsion, zona për pritjen e pacientëve, dhomë mjeku dhe infermieri, urgjencë, magazinë, sallë mbledhjesh dhe tualete. Në përfundim të procesit të rehabilitimit, këto qendra gjithashtu do të pajisen me tavolina, rafte dhe stola pritje për pacientët.
Mjekët e familjes që shërbejnë në katër qendra shëndetësore janë pajisur me çantën e mjekut, që përmban instrumente mjekësore bazë si stetoskopin për fëmijë dhe të rritur, puls oksimetër, glukometër, çekiç neurologjik, stetoskop fetal, etj,. Mjekët janë trajnuar për përdorimin e këtyre instrumenteve, të cilat mundësojnë një shërbim në kohë dhe cilësor për pacientët e kësaj zone. Gjithashtu, drejtuesit e këtyre qendrave shëndetësore janë trajnuar mbi menaxhimin shëndetësor dhe ekonomistët mbi financat shëndetësore, buxhetimin dhe prokurimet.
Projekti ‘Shëndet për të Gjithë’, i financuar nga Agjencia Zvicerane për Zhvillim dhe Bashkëpunim, po zbatohet në qarqet Dibër dhe Fier që prej vitit 2015.
Projekti synon të ndihmojë popullatën e këtyre dy qarqeve për të përfituar shëndet për të mirë nëpërmjet përmirësimit të shërbimeve të kujdesit shëndetësor parësor dhe aktiviteteve të promovimit shëndetësor. Përveç trajnimit të stafit mjekësore dhe kabineteve të promocionit shëndetësor, pajimit të mjekëve të familjes me çantën e mjekut dhe trajnimit të njësive të anti-korrupsionit pranë DSHP-ve lokale, HAP ka mundësuar edhe rehabilitimin e 6 qendrave shëndetësore në të dyja qarqet: në qarkun Dibër janë rehabilituar qendrat shëndetësore të Kastriotit, Komsisë, Maqellarës dhe Shupenzës; kurse në qarkun Fier janë rehabilituar qendrat shëndetësore të Cakranit dhe Libofshës.
