“Nuk kam dashur vras bashkëshorten por gjithçka ishte aksidentale. Unë e shtyva gjatë debatit dhe ajo përplasi kokën në tokë, çka i shkaktoi vdekjen”. Kjo ka qenë dëshmia në polici e 22-vjeçarit Thoma Hajdini, i cili dy ditë më parë u arrestua pasi akuzohet se ka vrarë gruan e tij 19-vjeçaren me iniciale F.SH.
Ai ka rrëfyer se ka pasur një debat me bashkëshorten në oborrin e banesës së tyre për shkak të problemeve ekonomike dhe debati ka agravuar deri në përdorimin e dhunës.
“Në një moment unë e shtyva me forcë, ajo përplasi kokën në tokë dhe kjo rezultoi fatale për të. Qëllimi im nuk ishte ta vrisja pasi e kam nënën e dy fëmijëve të mi, por gjithçka ishtë një aksident”, – ka pohuar 22-vjeçari.
19-vjeçarja nga Levani i Fierit ndërroi jetë pas plagëve të marra në kokë. Sipas të afërmeve të saj ajo është dhunuar nga bashkëshorti në oborrin e shtëpisë. Debati mes tyre që përfundoi tragjikisht ndodhi edhe në prani të dy fëmijëve të mitur të çiftit.
Trupi i viktimës është marrë nga të afërmit në Gjirokastër. Policia vijon hetimet për zbardhjen e rrethanave të plota të kësaj ngjarje.
