Blendi Fevziu shkruan se Partia Demokratike është kthyer në një parti mjerane.
Sipas tij, sot nga PD dëgjohet vetëm Sali Berisha dhe 6-7 persona të tjerë.
“Duke përjashtuar Berishën, aktiviteti i të cilit është impresionues, ata që aktivizohen janë pak emra. Disa deputetë të vjetër të opozitës së viteve ’97 – 2005 dhe disa të rinj të angazhuar në rreshtin e parë pas zgjedhjeve të 2013. Janë aq pak, sa ngjan mjerane se si një parti që ka pasur afro 30 ministra në 8 vitet e saj nuk i kalon dot 6 – 7 të angazhuar të përhershëm.
Janë po ata që flasin në parlament; që shëtisin studio më studio; që denoncojnë në podiumin e PD çështje problematike; madje që bëjnë opozitë në komisionet parlamentare edhe kur nuk janë kamerat ndezur. Në fakt, grupi parlamentar i PD nuk është i vogël. Një pjesë janë njerëz me eksperiencë dhe ekspertizë politike? Si shpjegohet mosakivizimi i tyre?
Ka dy përgjigje: ose kontestojnë lidershipin e Bashës, ose realisht nuk besojnë as tek opozitarizmi dhe as tek beteja ideologjike me PS. Pra thjeshtë janë kthyer në ca marifetçinj të politikës.
Në këtë rrethanë rikthehemi edhe një herë tek pyetja e parë. A ka kurajo Basha t’ju thotë atyre që tallen me opozitën e tij dhe të shqiptarëve se e ardhmja e tyre mbaron aty! Se opozita do jetë e ashpër dhe se grupi i memecëve politikë nuk mund të qëndrojë i heshtur të pritje të pushtetit të ardhshëm! Se opozitarizmi publik nuk kthehet në kapital politik për PD sepse publiku e ndjen se shumë prej deputetëve të saj nuk besojnë ose nuk e kanë me zemër këtë gjë.
Ndaj ai duhet të zgjedhë. Të ndërtojë një grup që beson tek opozita dhe të ecë para. Ose të vijojë një opozitë të gjatë për të cilën do jetë përgjegjës vetëm ai.
Nëse Basha nuk ndërton një grup të ri dhe të motivuar, protesta do jetë e dështuar. Shqiptarët kanë dëshmuar se e ndjejnë më mirë se çdo gjë, kur e beson një kauzë dhe kur e ke atë thjeshtë teatër”, shkruan Fevziu.
TEMA
