Gazetari Blendi Fevziu e konsideron paketën Anti-KÇK dhe Operacionin Forca e Ligjit, një nisëm të vonuar, që do të duhej të kishte vepruar kohë më parë.
I ftuar në emisionin “Java në RTSH”, Fevziu u shpreh se prokurorët belgë kanë dorëzuar në prokuroritë tona dosje me prona, që buronin nga parat e aktiviteteve kriminale.
“Është një nismë e vonuar, pasi forca e ligjit duhej të kishte vepruar kohë më parë. Edi Rama ka dhënë përshtypjen gjatë takimeve me ndërkombëtarët se kemi bërë gjithçka për kapjen e tyre, por problemi ka ekzistuar tek sistemi i drejtësisë. Kryeministri e kuptoi së fundi se lufta ndaj krimit nuk është thjesht justifikim, por edhe një argument për hapjen e negociatave. Prokurorët belgë kanë dorëzuar në prokurori dosje me prona të kriminalizuara që buronin nga parat e aktiviteteve kriminale të ushtruara nga këta persona në vende të ndryshme të Europës”, tha Fevziu.
Gazetari shtoi se KÇK në vetvete është një frazë që i përkëdhel njerëzit. Ai shtoi se shumica as nuk e ka lexuar fare aktin normative në fjalë duke u keqkuptuar se target do të ishin politikanët dhe korrupsioni i lartë.
“Paratë e krimit nuk e kanë ndihmuar kurrë ekonominë e një vend. Në thelb, arrogance e krimit ndaj qytetarit të thjeshtë është arrogancë ndaj ligjit” – tha Fevziu teksa ishte i ftuar në panelin e analistëve Preç Zogaj dhe Lorenc Vangjeli.
