Prej datës 10 Maj ka filluar aktiviteti më i madh folkloristik i vendit në Gjirokastër. “Festivali Folklorik i Gjirokastrës 2015” ka për qëllim mbrojtjen dhe popullarizimin e vlerave më të mira muzikore, koreografike, etnografike trashëguar në shekuj të shqiptarëve, por edhe mbajtjen e një tradite që ka filluar dekada më parë në kohën e komunizmit.
Në konkurrim janë plot 12 qarqe te vendit të cilat garojnë për të fituar trofeun e “Festivalit Folklorik të Gjirokastër 2015”. Puna përgatitore ka përfshirë Drejtoritë Rajonale të Kulturës Kombëtare në bashkëpunim me specialistët e trashëgimisë kulturore të Ministrisë së Kulturës, Qendrës Kombëtare të Veprimtarive Folklorike, grupeve të punës në qarqe dhe qendrat kulturore të komunave e bashkive dhe me ansamblet muzikore. Ndërkohë, që Ministria e Kulturës ka njoftuar se në bashkëpunim me DRKK-Gjirokastër kanë nisur edhe ndërhyrjet e fundit restauruese në skenën dhe në kalanë e Gjirokastrës ku do të zhvillohet aktiviteti.
Në këtë festival, veç grupeve shqiptare, janë pjesëmarrëse edhe grupe folklorike të ftuar nga Kosova, Mali i Zi, Maqedonia, Arbëreshët e Italisë, Turqia, Greqia, Zvicra apo edhe SHBA-ve. Risia e këtij edicioni do të jenë artistët e mirënjohur si Eda Zari, Olen Çezari, Rona Nishliu, grupi “Fanfara Tirana” dhe disa grupe evropianë të ftuar të muzikës folk, të cilët do të performojnë në orët e natës. Çdo ditë për 24 orë do ketë një festë me muzikë folklorike, kostume, panaire, zeje tradicionale, ekspozita, projeksione filmash, Open Stage me muzikë alternative, dhe mjaft organizime qe po e gjallërojnë Gjirokastrën.
