Këtë fundvit, Shqipëria është shndërruar në destinacionin e preferuar të italianëve dhe bullgarëve për të festuar Vitin e Ri.
“Ka një numër shumë të madh italianësh që vijnë për Vitin e Ri këtu. Italianët nuk festojnë Vitin e Ri në vendin e tyre, festojnë Krishtlindjen. Dhe vijnë në Shqipëri për Vitin e Ri sepse ju pëlqen atmosfera, festa, çmimet ju duken shumë ekonomike. Kemi një rritje të madhe edhe nga tregu bullgar. Sivjet thuajse të gjitha hotelet e mira, ato me standarde, janë të rezervuara nga bullgarët. Kanë ardhur të organizuar për të festuar Vitin e Ri në Shqipëri”, tha Rrahman Kasa, Unioni turistik shqiptar.
Veç Tiranës, turistët e huaj kanë zgjedhur në mënyrë masive edhe qytetet bregdetare për ndërrimin e viteve.
“Bullgarët janë në Golem, të gjitha hotelet e mira të Golemit janë të rezervuara. Ka edhe në Vlorë, Sarandë, edhe italianët zgjedhin edhe bregdetin, edhe Tiranën. Tirana ka plot turistë të huaj, por jo të organizuar”, shtoi Kasa.
Nga ana tjetër, ka edhe shumë shqiptarë që Vitin e Ri kanë zgjedhur ta festojnë jashtë vendit.
“Një numër i madh janë në Kosovë, falë turizmit dimëror të organizuar atje. Ka një numër tjetër që zgjedhin vendet e BE, në Greqi, në Paris, në qytetet e Italisë, por ka një numër që shkojnë edhe në Dubai, falë linjës direkte që kemi dhe paketave që ofrojnë. Ka një numër të madh që shkojnë edhe në mënyrë individuale, bëhen disa familje bashkë dhe ikën për turizëm dimëror jo vetëm në Kosovë, por edhe në veriun e Italisë e në alpet e Zvicrës”, deklaroi ai.
Paketat që zgjedhin shqiptarët për të udhëtuar jashtë vendit variojnë nga 40-100 euro për person për një natë, në varësi të yjeve të hotelit ku do të akomodohen dhe destinacioneve që kanë zgjedhur.
