Policia e Shtetit ka marrë të gjitha masat për garantimin e rendit, rritjen e parametrave të sigurisë rrugore, si dhe të krijimit të lehtësirave ligjore në pikat e kalimit të kontrollit kufitar, gjatë festave të fundvitit 2016 dhe Vitit të Ri 2017.

Për këtë qëllim të gjithë strukturat e Policisë së Shtetit duke filluar prej orës 16:00 të datës 19.12.2016 do kalojnë në shërbim të përforcuar deri në datë 05.01.2017.

Gjithashtu në gatishmëri do të kalojnë edhe strukturat e Forcave Lëvizëse Operacionale si; Reparti RENEA dhe Repartet e Ndërhyrjes së Shpejtë.

Drejtoria e Policisë së Shtetit ka hartuar dhe miratuar një Plan me detyra konkrete për të gjithë strukturat e Policisë në nivel qendror dhe nivel vendor.

Në bazë dhe në zbatim të këtij Plani nga Drejtoritë Vendore të Policisë dhe Drejtoritë Vendore të Kufirit dhe Migracionit janë hartuar plane specifike.

Për monitorimin e situatës së rendit dhe sigurisë publike në të gjithë territorin e vendit janë ngritur dhe do funksionojnë çdo ditë grupet e drejtimit të shërbimeve policore në nivel qendror dhe në të gjithë Drejtoritë Vendore të Policisë dhe Komisariatet e Policisë.

Masat e marra për tu zbatuar nga strukturat e Policisë së Shtetit në nivel qendror dhe vendor synojnë :

Rritjen e sigurisë publike në të gjithë territorin e vendit duke shtuar numrin e patrullave të përgjithshme përgjatë 24 orëve.
Marrjen e masave për krijimin e lehtësirave të nevojshme për qytetarët në të gjithë pikat e kalimit kufitar, duke shtuar numrin e sporteleve dhe të personelit policor.
Përforcimin e masave për rritjen e sigurisë rrugore në të gjithë akset kryesore rrugore të vendit, duke rritur numrin e patrullave të policisë rrugore, si duke patrulluar me Grupe të Forcave të Ndërhyrjes së Shpejtë për të rritur sigurinë në këto akse rrugore.
Forcimin e bashkëpunimit me të gjithë institucionet e tjera ligjzbatuese në vend në funksion të rritjes së parametrave të sigurisë dhe parandalimin e ngjarjeve të mundshme kriminale.
Marrjen e masave për mbarëvajtjen e të gjithë aktiviteteve festive që do të zhvillohen nga institucionet e ndryshme shtetërore, organet e qeverisjes vendore dhe institucionet e tjera me rastin e festave të fundvitit.
Marrjen e masave për sigurimin, grumbullimin, përpunimin dhe analizimin e informacioneve mbi çdo tendencë dhe aktivitet të mundshëm kriminal dhe terrorist, apo tendenca të tjera të mprehta kriminale që lidhen me zhvillimin e festave të fundvitit.
Forcimin e masave për kontrollin ndaj personave me rrezikshmëri të lartë shoqërore me qëllim parandalimin e kryerjes së ndonjë akti të mundshëm kriminal.
Përforcimin e masave të sigurisë për ruajtjen e objekteve më të rëndësishme shtetërore, publike e private, nënstacionet elektrike apo te depove të ujit pijshëm.

Policia e Shtetit kërkon bashkëpunimin me median dhe publikun në lidhje me:

Informimin e publikut për masat e Policisë për sigurimin e rendit publik.
Dhënien e këshillave qytetarëve me qëllim parandalimin e ngjarjeve me pasoja të rënda nga përdorimi pa kriter i fishekzjarrëve, për mënyrën e përdorimit të tyre duke kërkuar mos përdorimin nga të miturit apo përdorimi nën kontrollin e prindërve, etj.
Kërkimin e ndihmës, bashkëpunimin dhe mirëkuptimin e qytetarëve në rastet e kufizimeve të përkohshme në disa prej akseve rrugore për shkak të zhvillimit të aktiviteteve masive kulturore e fetare.

Duke shpresuar në mirëkuptimin dhe bashkëpunimin tuaj dhe të komunitetit, Policia e Shtetit ju uron Gëzuar Festat e fundvitit, mbarësi e begati në familjet tuaja./a.m.