“Opozita anashkalon mekanizmat ligjorë dhe funksionalë të demokracisë, duke përdorur gjithnjë skenarin e dhunës, alternativën e kaosit si dhe të trazirave”. Kështu u shpreh sot deputetja e Partisë Socialiste, Klotilda Ferhati gjatë një interviste televizive duke theksuar se situata të tilla çojnë në vonesën e reformave mjaft të rëndësishme për vendin.
“Opozita duke anashkaluar mekanizmat ligjorë dhe funksionalë në demokraci, zgjedhin gjithmonë skenarin e dhunës, alternativën e kaosit dhe të trazirave dhe gjithnjë kanë humbur. Unë nuk arrij të kuptoj, se përse vijojnë t’i bëjnë dëm Shqipërisë, sepse nuk është vetëm në imazh, por këto situata na bëjnë që të mbetemi mbrapa me zbatimin e reformave dhe ligjeve.
Lufta nuk është kush e mban pushtetin, atë duhet ta fitosh me votë dhe të bindësh qytetarët se alternativa që paraqet është më e mirë”, – theksoi deputetja e PS.
Sipas deputetes së PS, në protestën e sotme nuk janë artikuluar shqetësime nga ana e qytetarëve dhe nëse do të kishte të tilla, ato do të mbaheshin shënim nga ana e qeverisë, në mënyrë që të gjendej zgjidhje.
“Nga mesazhet e sotme siç e ndoqët edhe juve mesazhe nuk pati. Por nuk kishte nevojë për ne që të mos i dimë shqetësimet e qytetarëve, dhe të na i tregojnë protestat e sotme. Qeveria ka komunikimin e përditshëm me qytetarët. Qytetarët mund të komunikojmë me ne qoftë nga zyrat e deputetëve në zonat elektorale, qoftë nga platforma e bashkëqeverisjes, nga zyrat e informimit publik të institucioneve të ndryshme. Ne po përpiqemi që çdo ankesë të qytetarëve të merret dhe të orientohet drejt zgjidhjes. Sigurisht nëse qytetarët do të ngrinin dhe artikulonin probleme në këtë protestë, sigurisht që do të shënoheshin dhe analizoheshin nga ana jonë. Por sot, fatkeqësisht nuk dëgjuam qytetarë që të ngrinin shqetësime, ne sot dëgjuam vetëm 2-3 fjali nga partitë politike”, – theksoi ajo.
/a.meta
