Speciale Javanews/ Falsifikimi i dokumenteve të ndryshme është një vepër penale mjaft e përhapur në Shqipëri, dhe qëllimet janë nga më të ndryshmet. Ndër rastet më të përhapura janë ato të falsifikimit të dokumenteve të identitetit të huaja, që përdoren kryesisht për të emigruar në vendet e zhvilluara perëndimore. Por së fundi Policia e Shtetit ka konstatuar një fenomen të ri, që lidhet me grabitjen e identitetit të dikujt. Janë konstatuar disa raste kur persona të caktuar, arrijnë të sigurojnë mjete identifikimi si pasaporta apo karta identiteti me foton e tyre, por me të dhënat e një personi tjetër. Këto mjete identiteti kanë rezultuar të sakta, por me “identitet të grabitur”. Personat që arrijnë të sigurojnë këto dokumente duke i grabitur identitetin dikujt tjetër, i përdorin ato për qëllime nga më të ndryshmet. Përmes dokumenteve false gjatë aplikimit, këta persona mundin të sigurojnë identitetin e tjetrit. Por, këto dokumente false për aplikim, arrijnë të sigurijnë një dokument identiteti të vlefshëm të lëshuar nga kompania e kontraktuar nga shteti.
Si i’u vodh identiteti 49-vjeçares
Një shtetase 49-vjeçare nga Tirana me inicialet N.R. denoncoi disa ditë më parë në Policinë e Tiranës rastin e saj. Nuk dihet se si, por gruaja kishte zbuluar se një person tjetër kishte mundur të siguronte kartë identiteti dhe pasaportë biometrike me të gjitha të dhënat e saj personale. Pra, një i huaj i kishte vjedhur asaj identitetin. Jo vetëm emër mbiemër, por edhe të dhënat e tjera, që përmban mjeti i identifikimit vendlindjen, datëlindjen. Pra, një tjetër person jetonte sikur të ishte 49-vjeçarja N.R. nga Tirana. Mësohet se shtetasja që kishte arritur t’i grabiste identitetin, kishte aplikuar në zyrat e kompanisë së konstraktuar nga shteti “Aleat” e cila ka lëshuar pasaportën dhe kartën e identitetit. Personja në fjalë është paraqitur për aplikim me dokumente false. Pasaporta dhe karta e identitetit që ka tërhequr janë të rregullta dhe askush nuk mund të kuptojë që është vjedhur identiteti i dikujt, pasi përmbajnë të gjitha parametrat e sigurisë, edhe pse identiteti është i rremë. Tashmë policia ka nisur hetimet për këtë rast, por zbulimi duket mjaft i vështirë. Gjurmimi i persones në fjalë mund të bëhet vetëm kur ajo e përdor pasaportën për udhëtime jashtë vendit, apo përdorim për arsye të ndryshme ku duhet ta paraqesë.
Parandalimi i një rasti
Një rast i ngjashëm u zbulua nga policia e Durrësit disa ditë më parë, para se një person të mundte të siguronte pasaportë me të dhëna të rreme. Një 65-vjeçar me inicialet A.H. u arrestua pasi aplikoi me të dhëna personale të falsifikuara, të cilat i përkisnin një personi tjetër. Ai u paraqit me një çertifikatë të falsifikuar në zyrën e aplikimit për pasaportë, ku ishin të dhënat që ai kërkonte në pasaportën e re. Rasti i tij ngjalli dyshime tek punonjësit e zyrës. Pas verifikimeve në sistem, ata konstatuan se me të dhënat e paraqitura nga 65-vjeçari, rezultonte një tjetër person në sistem, që kishte pamje të ndryshme. Pra ky shtetas, kishte marrë identitetin e një tjetër personi dhe kishte vendosur foton e tij. Pasi u zbulua 65-vjeçari u arrestua nga blutë e Durrësit.
Rreziqet nga grabitja e identitetit
Grabitja e identitetit të dikujt mund t’i hapë shumë probleme me ligjin personit që ka rënë viktimë e këtij krimi pasi “grabitësi i identitetit”, mund të kryejë veprime anti-ligjore në emrin e dikujt tjetër. Ai/ajo mund të përdorë kartën e identitetit dhe pasaportën për veprime të ndryshme kriminale, të firmosë një dokument, të bëjë një padi, të nënshkruajë kontrata fiktive të llojeve të ndryshme, etj. etj. I ka mundësitë për sa kohë posedon pasaportën e rregullt që askush nuk mund ta kuptojë se është me identitet të grabitur. Po ashtu, personit që i është grabitur identiteti mund të përfundojë i grabitur edhe financiarisht. Atij mund t’i preken llogaritë bankare me mjaft lehtësi. Personi që i ka marrë identitetin, shkon me pasaportë në bankë dhe mund të tërheqë të gjitha paratë e tij. Pra rreziku është i gjithanshëm.
