Ministrja e Shtetit për Marrëdhëniet me Parlamentin, Ermonela Felaj, duke folur në seancën e sotme plenare ku po diskutohen ndryshimet në Kodin Penal, vlerësoi si të pamjaftueshme masat administrative në sektorët e doganës dhe tatimeve si ndëshkim për evazorët dhe shkelësit e ligjit.
Prandaj sipas saj, Kodi Penal duhet pasuruar me ndryshime të reja në mënyë që informaliteti dhe evazioni të luftohen nëpërmjet çdo instrumenti ligjor të mundshëm.
Ndryshimet e propozuara prekin vetëm dy seksione, doganat dhe tatim taksat.
Vetëm veprimi administrativ do të ishte i pamjaftueshhëm si masë ndëshkuese ndaj atyre që evazojnë shtetin, ndaj në lojë duhet të futet edhe Kodi Penal. Evazioni fiskal është i kundraligjshëm pasi kërkon t’i marrë shtetit atë që është e shtetit. Evazioni fiskal është një plagë e vertetë sociale ndaj duhet t’i kundërvihemi me të gjithë instrumentet ligjore. Me ndryshimet e propozuara, kërkojmë të sigurojmë një gjë të vetme, të fitojë jo kush evazon shtetin por kush punon në rrugë të ndershme, ndaj do e quaja këtë, betejë për qytetarin e ndershëm”, u shpreh Felaj.
Ajo siguroi gjithashtu se “ndryshimet e propozuara nuk ndryshojnë nocionin bazë të veprës penale, vetëm shtohen disa dispozita të reja, që janë reflektime të shfaqjeve të reja të veprave penale”.
ATSH
