Abdiu flet dhe për reformën në drejtësi, ku zvarritjen e këtij procesi nga ana e Parlamentit e quan të pajustifikuar. Konstitucionalisti shprehet per “Shekulli” se Parlamenti shqiptar ka nivelin më mediokër të këtyre 25 viteve demokraci. Për të “pastruar” tempullin e demokracisë nga “gladiatorët”, Abdiu thotë se ka ende shpresë.
Kemi disa ngjarje që konkurrojnë njëra-tjetrën në tensionimin e situatës politike në vend. Opozita kërkon qeveri teknike për të siguruar mbarëvajtje të procesit zgjedhor si dhe ka bojkotuar parlamentin duke e bërë “nul” Reformën në Drejtësi. Çfarë po ndodh?
Parlamenti shqiptar dogji një shans shumë rëndësishëm që shqiptarët patën. Shqiptarët pra kanë humbur një mundësi të rëndësishme për nisjen e bisedimeve me Bashkimin Europian. Dhe organi i vetëm ose organi kryesor që ka përgjegjësi më të madhe për këtë punë, është parlamenti shqiptar. Ky i fundit ua dogji shqiptarëve këtë mundësi për tu përfshirë në bisedime me BE. Ky parlament ka përgjegjësi të madhe në mënyrë të veçantë për zvarritjen e pajustifikuar të Reformës në Drejtësi. Një fenomen i papërligjur. Ky parlament ka dëshmuar papërgjeshmërinë e tij si institucion, me sa duket ka të bëjë me faktin se në përbërjen e tij ka kandidatë për deputetë dhe deputetë që nuk e meritonin të ishin aty.
Zgjedhjet janë shumë afër dhe shanset që reforma zgjedhore të kryhet siç i premtua janë minimale. Në këndvështrimin tuaj pse dështoi ky proces?
Është e vërtetë se situata është kritike dhe për sa i përket zgjedhjeve të ardhshme, ende ligji elektoral nuk është përsosur, rregulluar. Vetëm në Shqipëri besoj se ndodh kjo që sa herë ka zgjedhje gjashtë muaj më përpara nisin reformat për ligjin zgjedhor. U bënë 15 vjet dhe ende kjo e ashtuquajtura reformë nuk ka përfunduar akoma. Unë mendoj se faktori ndërkombëtar qoftë me këtë por dhe me probleme të tjera është treguar mjaft neglizhent. Reforma zgjedhore bëhet një herë apo dy herë dhe nuk diskutohet më. Këtu flasim për reformë e reformë nuk bëjmë kurrë. Ndërkombëtarët e kanë zvarritur këtë gjë me justifikimin se do të sjellin dispozita të qarta por ende nuk kanë sjellë një paketë të plotë në lidhje me amendimet në legjislacion. Nuk kanë propozuar një kod zgjedhor tërësor ose të plotë.
Në këtë klimë të tensionuar ku paratë e drogës rrezikojnë zgjedhjet a mund të mbahen zgjedhje të lira?
Ne duhet të shkojmë në zgjedhje si një popull i qytetëruar. Opozita nuk është bankë për të kontrolluar paratë e shqiptarëve, por duhet të bëjë opozitën duke kërkuar transparencën dhe mazhoranca duhet t’ia sigurojë atë.
Për tensionimin e gjithë kësaj situate politike maxhoranca nuk ka asnjë mëkat?
Mazhoranca mund të ketë mangësi dhe probleme për detyrimin që ka për ta dëgjuar opozitën me të vërtetë dhe të plotësojë ndonjë kërkesë të saj.
Çfarë i këshilloni maxhorancës?
Mazhoranca duhet t’i drejtohet Presidentit dhe ky i fundit të bëjë të pamundurën për të bindur të gjitha partitë për tu futur në zgjedhje. Ndryshimet në qeveri do të vlerësohen ditën e votimit por nuk duhen marrë si justifikim nga opozita për të mos marrë pjesë në zgjedhje. Opozita duhet të përgatitet për zgjedhje dhe nëse ka ankesa duhet të drejtohet në institucionet përkatëse. Duke mos marrë pjesë në zgjedhje opozita u mohon shumë shqiptarëve të drejtën kushtetuese, të votës.
Cili është mendimi juaj për protestën e opozitës?
Të huajt është dashur urdhërojnë opozitën të futet në parlament sepse ne jemi mësuar të marrim vesh vetëm me të urdhëruar. Nuk mund të paralizohet jeta politike dhe sociale me pretendimin se do të bëhen zgjedhje me gabime. Mua të gjitha kërkesat e opozitës më duken marrëzira. Edhe popujt e tjerë kanë pasur problematike por kurrë nuk kanë penguar për zhvillimin e zgjedhjeve.
Ndryshimet në qeveri tre muaj para zgjedhjeve ju duken normale? Ndryshimet në qeveri janë përgjegjësi e kryeministrit, është votuesi ai që e gjykon vendimin tij me anë të votës me 18 qershor.
Ndërsa për akuzat që ka ngritur opozita për ministra të veçantë të dërgojë dosjet në organet e drejtësisë.
Jemi dhe para zgjedhjes se Presidentit të ri dhe asnjë nga partitë nuk flet. Si duhet të jetë presidenti i Shqipërisë dhe pse është sfumuar ky post kaq i rëndësishëm?
Jemi në afatet e fundit të zgjedhjes së presidentit për të cilin askush nuk e vret mendjen sepse sipas lidershpit të të gjitha forcave politike kemi ngjarje tjera më të rëndësishme. Duhet ta dimë të gjithë se zgjedhja e Presidentit të Republikë është një ngjarje e madhe, e cila duhet të shoqërohet me sensibilizim të të gjithë opinionit kombëtar për zgjedhur një personalitet me vlera. Siç po kuptohet, partitë e maxhorancës kanë rënë dakord për të bërë një kompromis në ditët e fundit, duke na bërë peshqesh ndonjë figurë që parapëlqehet nga kryeministri apo nga aleati i maxhorancës. Qëndrimi që kanë palët për mënyrën e përzgjedhjes së presidentit më duket e gabuar. Sot ka shumë organe që kanë mandate të mbaruara. Avokati i Popullit i cili ka përgjegjësi shumë të rëndësishme kushtetuese për përzgjedhje të kandidaturave në organet e drejtësisë e ka mandatin e përfunduar. Po ashtu janë me mandat të mbaruar gjyqtarë të Gjykatës së Lartë, të Gjykatës Kushtetuese, dhe titullarë të tjerë në organet e drejtësisë që marrin rroga dhe që bëjnë lloçe nëpër kafene.
ma.me
