Kompania për të kontrolluar dhe hetuar bastet, “Federbet”, nëpërmjet një njoftimi të fundit për shtyp e ka konsideruar ndeshjen e Ligës së Europës, Sporting Lisbona-Skënderbeu 5-1 si të “dyshuar” për trukim.
Njoftimi për shtyp
”Federbet konsideron se ndeshja e futbollit, Sporting Lisbona-Skënderbeu, e luajtur më 22 tetor 2015 (e vlefshme për fazën në grupe të Ligës së Europës), dyshohet si e fiksuar. Anomalia në rrjedhën e basteve ka filluar gjatë lojës “live” dhe, në veçanti, në pjesën e dytë, ku “OVER” vazhdoi të ulet sesa të rritej. Është e rëndësishme të vërehet rezultati përfundimtar 5-1, duke konfirmuar këto anomali.
Duke u ndalur në përditësimin e vlerës së luajtur, e cila ishte në rënie, minutë pas minute, konstatojmë pikërisht të kundërtën e asaj që duhet të ndodhë në një lojë të rregullt. Përshembull, kjo vlerë, me një koefiçent 5.0, në mënyrë të konsiderueshme është ulur disa minuta para se të shënohet një gol tjetër. Anomalia ka të njëjtën strukturë, që gjendet në dy rastet e para, të raportuara nga “Federbet”, për ekipin shqiptar të Skënderbeut.
“Që nga viti 2002, ne dimë shumë gjëra rreth lojërave të dyshimta në garat europiane, në të cilat, shumicën e rasteve ekipet shqiptare ishin të përfshira, – thotë Francesco Baranca, sekretari i përgjithshëm i “Federbet”.
