Federbet, organizat kundër trukimit të ndeshjeve, ka akuzuar përsëri Skënderbeun sot, pas ndeshjes së mbrëmshme me Lokomotiv të Moskës. Takimi u fitua nga rusët 3-0, me dy golat e fundit të shënuar në minutat 89 e 90, pas dy gabimeve foshnjarake të mbrojtjes korçare.
Federbet shkruan qartazi “Skënderbeu godet sërish, për të katërtën herë këtë sezon”, duke përmendur edhe ndeshjet e mëparshme të përfunduara nën radarin e organizatës: me Crusaders, më 23 korrik, me Dinamon e Zagrebit, më 25 gusht dhe me Sportingun e Lisbonës, më 22 tetor.
Federbet ka ilustruar duke publikuar koeficientët që sipas organizatës janë inkriminues për kampionët e Shqipërisë:
“Në minutën e 77-të, kur rezultati ishte 0-1, kuota over 2.5, pra që shënohen edhe dy gola të tjerë, ishte në mënyrë të pashpjegueshme e ulët, 1.75, duke pasur parasysh kohën e paktë të mbetur.
Në minutën e 87-të, gjithmonë në rezultatin 0-1, over 1.5, pra që shënohet e pakta edhe një gol, ishte 1.6, koeficient jashtëzakonisht i ulët dhe i pashpjegueshëm, kur kishin mbetur edhe vetëm tri minuta lojë.
Lokomotiv Moska shënoi edhe dy herë, në minutat 89 e 90, pas gabimeve në mbrojtje”.
“Denoncojmë sot, për të katërtën herë këtë vit, ndeshjet jashtëzakonisht të dyshimta të të luajtura në Europë nga Skënderbeu”, pohon sekretari i përgjithshëm i Federbet, Francesco Baranca. “Numrat nuk gënjejnë dhe tregojnë qartësisht që, kundër çdo logjike sportive, ka pasur fluks parash për rezultate që dukeshin, duke parë minutat në kronometër, absolutisht pak të mundshëm. Shpresojmë që pas këtij rasti të panumërt përpjekjesh të qarta të manipulimit sportiv, autoritetet sportive, mnë veçanti UEFA, të marrin masa për të siguruar ligjshmëri të plotë në kompeticionet e tyre”.
