Autoritetet amerikane pretendojnë se kanë parandaluar një sulm të mundshëm që mund të kishte shkaktuar mijëra viktima në Shtëpinë e Bardhë. Sipas zyrtarëve federalë të cituar nga mediat amerikane, Byroja Federale e Hetimit (FBI), në bashkëpunim me Shërbimin Sekret dhe agjenci të tjera të sigurisë, zbuloi dhe ndaloi një plan të dyshuar për të goditur eventin “UFC Freedom 250”, të mbajtur të dielën në ambientet e Shtëpisë së Bardhë, shkruan A2 CNN.
Sipas hetimeve paraprake, personat e dyshuar kishin planifikuar të përdornin dronë të mbushur me lëndë shpërthyese për të goditur ndërtesa pranë zonës së aktivitetit, me synimin për të krijuar panik dhe për të detyruar evakuimin e mijëra pjesëmarrësve. Në kaosin e krijuar, të pranishmit do të drejtoheshin drejt zonave ku, sipas autoriteteve, ishin pozicionuar snajperë të gatshëm për të hapur zjarr.
Hetuesit pretendojnë se plani përfshinte edhe një fazë të tretë, ku persona të tjerë do të tentonin të sulmonin portat e Shtëpisë së Bardhë. Deri të hënën, pesë persona janë arrestuar në lidhje me komplotin, ndërsa 23 individë të tjerë janë identifikuar si të përfshirë në diskutimet për organizimin e sulmit.
Sipas burimeve të cituara nga Fox News, komunikimet mes të dyshuarve ishin zhvilluar përmes aplikacionit të koduar Signal. Disa prej tyre kishin udhëtuar drejt Fredericksburgut në Virxhinia për përgatitjet finale të planit.
Në aktivitetin sportiv morën pjesë rreth 4300 persona, mes tyre presidenti amerikan Donald Trump, zëvendëspresidenti JD Vance, anëtarë të kabinetit qeveritar dhe figura të njohura të biznesit, përfshirë Mark Zuckerberg.
“Falë reagimit të shpejtë të FBI-së, Departamentit të Drejtësisë dhe partnerëve të sigurisë, sulmi i dyshuar u ndalua përpara se të vihej në zbatim”, tha drejtori i FBI-së, Kash Patel. Megjithatë, deri tani autoritetet amerikane nuk kanë publikuar dokumente gjyqësore apo detaje shtesë që konfirmojnë zyrtarisht të gjitha pretendimet e bëra në media lidhur me këtë rast.
