Kryeministri Edi Rama ka bërë një postim lidhur me gjendjen shëndetësore të Fatos Nanos.
Rama shkruan se po lutet për shëndetin e liderit historik të Partisë Socialiste ndërsa ndan edhe medaljen ‘Mirënjohje Publike’ që i ka akorduar Nanos.
Sipas Kryeministrit, Nano arritit t’i kthejë vuajtjet e burgut në frymë liberale. Ai shton se Nano i meriton lutjet për gjithçka që mundi t’i japë vendi.
Postimi i Ramës:
LUTEM PËR FATOS NANON
Në këto orë të vështira të luftës për jetën, lideri historik i Partisë Socialiste dhe njeriu që vuajtjen e padrejtë të heqjes së lirisë e ktheu në burimin e një fryme liberale në udhëheqje, në një kohë kur Shqipëria përballej me shëmtinë e egër të një konflikti politik të nxitur nga shpirti i hakmarrjes, padijes, errësirës dhe me egërsinë e pakufishme të një kapërcimi të madh historik, nga izolimi i tejskajshëm komunist drejt demokracisë si sprovë e tejmundimshme, në një tokë të djegur prej zjarrit e hekurit të perandorive e regjimeve që pasuan njëri-tjetrin qysh prej pavarësimit të Shqipërisë, ku nuk u rrit dot kurrë shtati institucional i shtetit e ku liria e ardhur me furinë e zemëratës popullore solli bashkë me dritën e së ardhmes edhe plagët e tmerrshme të shkatërrimit të shumëçkaje në emër të luftës për demokraci, meriton sot lutjet tona dhe mirënjohjen tonë për gjithçka të mirë mundi t‘i japë vendit dhe shoqërisë në rolet e rënda që pati gjatë karrierës së tij me të përpjeta e të tatëpjeta të mundimshme.
/a.r
