Politika ndër vite ka penguar hapjen e dosjeve, madje, gjatë 26 viteve,politikanë të caktuarkanë punuar për zhdukjen dhe asgjësimin e atyre dosjeve, që dëshmojnë për bashkëpunimin e tyre me Sigurimin e Shtetit. Sipas njohësve të dosjeve që gjenden në arkivat e shtetit, kryesisht në Ministrinë e Brendshme dhe në SHISH, dokumentet duhet të ishin hapur nga viti ’91-’94, pasi kjo do të ishte e vetmja mënyrë për zbardhjen e vërtetë të emrave të atyre politikanëve që kanë qenë pjesë e Sigurimit të Shtetit.
Por, a ka sot politikanë në Parlamentin Shqiptar, që kanë bashkëpunuar me Sigurimin e Shtetit? Këtë mund ta dëshmojë vetëm procesi i hapjes së dosjeve nga Autoriteti. Por, çfarë thonë njohësit e dosjeve të komunizmit? Ish-kreu i Shërbimit Informativ Shtetëror, Fatos Klosi, në një prononcim për “Sot”, ka deklaruar se në politikën aktuale ka shumë politikanë që kanë qenë bashkëpunëtorë të Sigurimit të Shtetit, duke bërë edhe ndarjen përkatëse. Klosi sqaroi se bashkëpunëtorët ndahen në kategori të ndryshme.
Siç ai sqaron, të kesh qenë bashkëpunëtorë i Sigurimit, do të thotë se i ke shërbyer shtetit, pra nuk duhet të konsiderohet menjëherë si një akt jo pozitiv. “Në politikë ka bashkëpunëtorë të ish-Sigurimit, dhe këta i kanë shërbyer shtetit. Edhe sot ka bashkëpunëtorë. Ka patur disa bashkëpunëtorë: bashkëpunëtorë për të bërë reprezalje, për të ndjekur spiunët e serbit, për të ndjekur hajdutët.
Pra, dikush që i ka shërbyer shtetit, nuk duhet parë si armik. Por Autoriteti nuk do të hapë dosjet e bashkëpunëtorëve, por dosjet e atyre që janë ndjekur nga Sigurimi. Pasi ky proces të funksionojë, të shohim se çfarë do të ndodhë”, u shpreh Klosi.
Ish-kreu i spiunazhit shqiptar, Fatos Klosi, deklaron se pjesa më e madhe e dosjeve janë asgjësuar, janë shpallur të pavlefshme. “Hapja e dosjeve pas 26 viteve, më duket qesharake! Një pjesë e dosjeve janë asgjësuar; domethënë janë shpallur të pavlefshme”, tha ai. Ndërkaq, ai deklaron se dosjet agjitacion-propagandë dhe tentativë për arratisje u eliminuan përfundimisht që në vitin 1991, pasi ishin të pavlefshme dhe nuk përbënin vepër penale. “Atëherë, Sigurimi i Shtetit punonte me figura krimi.
Dosjet që lidheshin me agjitacion-propagandë, edhe me tentativë për arratisje, këto dy figura krimi u hoqën nga Kodi Penal në vitin ’91. Shumë dosje të tilla u quajtën të pavlefshme se nuk përbënte më krim as tentativa arratisje, as agjitacion- propagandë, u eliminuan me vendim. Ishte një proces legal. Në ato pesë vitet e para që ishte Gazidede në shërbim, shumë dosje, që në një farë mënyre mund të diskreditonin njerëz të rëndësishëm të PD u hoqën, u eliminuan”, deklaroi Klosi.
ma.me
