Institucionet nuk do të jenë alternativa e vetme për fëmijët pa kujdes prindëror. Ligji i ri për kujdesin alternativ, i cili sapo ka hyrë në fuqi, mundëson krijimin e familjeve kujdestare profesionale.
“Janë fëmijë jashtë kujdesit prindëror që edhe aktualisht janë në institucionet rezidenciale. Fëmijë që ndodhen në situata dhune apo rruge, të identifikuar nga strukturat përgjegjëse”, thotë Denada Seferi, zv/ministre e Shëndetësisë dhe Mbrojtjes Sociale.
Ligji i ri, në kuadër të përafrimit me atë të BE-së, synon t’i japë strehën e familjes fëmijëve të braktisur apo që ndodhen në kushte të vështira.
“Të gjitha studimet tregojnë se fëmija i rritur në një institucion krijon problematikat e veta gjatë rritjes, siç është frika, ankthi. Kështu që alternativa më e mirë është një familje kujdestare”, shprehet Seferi për Tv Klan.
Familjet kujdestare profesionale do të trajtohen me një pagesë mujore të posaçme. Por që të fitojnë të drejtën për t’i ofruar strehë dhe kujdes kësaj kategorie fëmijësh, këto familje duhet të plotësojnë disa kritere strikte.
“Duhet të kenë karizmën dhe ndjenjën për të ofruar këtë shërbim. Duhet të jenë familje që kanë etikë, që kanë treguar se janë familje e konsoliduar, që janë me shtetësi shqiptare, që janë të rregullta, do të trajnohen, certifikohen. Familjet shqiptare të mendojnë se tashmë kanë mundësinë që të shpëtojnë një fëmijë që ka nevojë për ta. Duam që ata të rriten në një mjedis familjar”, shton zv/ministrja.
Ligji parashikon gjithashtu edhe familjet vullnetare, ku prioritet në këtë rast kanë të afërmit me lidhje gjaku që shprehin interes për të marrë kujdestarinë e fëmijës.
“Kemi nisur hapat e para të kujdestarisë së përkohshme, ka funksionuar kryesisht brenda familjes biologjike, kemi 300 raste. Por ajo që ka rëndësi për ne është familja kujdestare profesionale”, shprehet Seferi.
Në të dyja rastet, si për familjet kujdestare ashtu edhe për ato vullnetare, duhet të merret mendimi i fëmijës nëse do të bëhet pjesë e tyre. Ndërkohë, të gjitha familjet që duan të bëhen pjesë e kësaj skeme mund të aplikojnë pranë zyrave të bashkive.
