Familjarët e Visar Begaj, i cili humbi jetën tragjikisht si pasojë e rrëzimit të avionit dy ditë më parë në afërsi të Shkupit, kërkojnë që trupi i tij pas procedurave ligjore të kthehet në Kosovë dhe jo në Itali.
Familjari i tij dhe njëkohësisht kreu i Komunës së Malishevës, Ragip Begaj, në një deklaratë për televizionin Alsat kërkon që ambasadat e Italisë dhe Kosovës të veprojnë sipas kërkesave të familjarëve.
“Kërkesa e prindit të Visarit i cili ishte në Ambasadën italiane dhe atë kosovare në Shkup, ka qenë që familjari jonë ta ndalet këtu (në Kosovë).
Unë besoj se marrëveshjet mes ambasadave do të përfundojnë në favorin tonë, sepse ai është familjar i joni. Ne presim prej Ambasadës italiane dhe kosovare në Shkup, që këto çështje t’i administrojnë si duhet.
Edhe pse Visar Begaj ka pasur dy shtetësi, kërkesa e prindit është që ai të varroset në Kosovë”, tha Ragip Begaj, kryetar i Malishevës.
Nga Ambasada e Kosovës nuk ka qëndrim! Alsat pyeti se vallë ambasadori Ylber Hysa ka kërkuar që trupi i bashkështetasit të tij të kthehet në Kosovë, por nuk morëm asnjë përgjigje.
Alsat tentoi të kontaktojë edhe me ambasadën e Italisë në Shkup e cila kërkon që të gjithë trupat t’i dorëzohen Italisë, por meqenëse ishte festë shtetërore, nuk arritëm të komunikojmë me asnjë zyrtarë. (b.an)
