Gjykata e Tiranës pranoi sot kërkesën e Selami Simsek për gjykim të shkurtuar. Ai u arrestua në korrik të vitit 2019 në Rinas, ku u kap me vizë të falsifikuar, për të cilën kishte paguar 5 mijë euro në Prishtinë.
Seanca është shtyrë për në datën 27 janar, ora 10:00 me qëllim përgatitjen e konkluzioneve përfundimtare. Është zbardhur dëshmia e Simsek, i cili tregoi se kush e ka ndihmuar për të marrë vizën.
“Për t’u larguar më ndihmoi një shtetas turk, ndërsa me vizë kanadeze u pajisëm në Prishtinë. Kam folur me të turqisht, më kërkoi para për të më pajisur me një vizë, ndërsa pagesën e kam kryer përmes bankës, llogarinë e së cilës nuk e mbaj mend. Paratë u derdhën nga një kushëri i imi në bankë, i cili nuk e dinte se përse po i depozitonte ato para. Personit me emrin Kursak, i dërgova një foto në whatsapp dhe më pas ai më kërkoi të udhëtoja në Kosovë, atje do të siguroja edhe vizën. Kur mbërrita në Kosovë, u ndalova në Prishtinë, qëndrova në një banesë pranë stacionit të autobusëve së bashku me Harun Çelik. Në këtë banesë erdhi një shtetas rreth 30 vjeç e më mori pasaportën, ku vendosi vizën kanadeze. Më pas prenotova biletat Rinas – Vjenë ( tranzit ) dhe Toronto”, u shpreh Simsek, raporton Balkanweb.
Kur u arrestua në Rinas, së bashku me të ishte mësuesi turk Harun Çelik dhe të dy njihen si mbështetës të Fetullah Gylen.
Ndërkohë, Harun Çelik u dëbua me urgjencë nga Shqipëria mbrëmjen e 1 janarit 2020 kur të gjithë ishin pushim me qëllim shmangien e debateve për shkak të ndjeshmërisë që kanë dëbime të tilla në Turqi nisur nga fakti se të burgosurve iu mohohen të drejtat themelore, siç është një proces i rregullt gjyqësor.
Mediat turke raportuan se marrja e Çelikut nga Shqipëria ishte një operacion i shërbimeve sekrete turke.
g.kosovari
